३० लाखांचे बजेट अन् कमावले तब्बल ५४ कोटी; ‘हा’ ब्लॉकबस्टर चित्रपट मोफत पाहता येणार, वाचा नाव…

अभिनेते मनोज तिवारी यांनी मुंबईत भारतीय राष्ट्रीय सिनेमा अकॅडमीच्या (INCA) शुभारंभ कार्यक्रमात बोलताना एक मोठा खुलासा केला. आपल्या करिअरच्या सुरुवातीला केलेल्या एका सिनेमाबद्दल त्यांनी सांगितलं. त्यांच्या एका चित्रपटाच्या निर्मितीसाठी फक्त ३० लाख रुपये खर्च आला होता. सिनेमाने तब्बल ५४ कोटी कमावले होते, पण तरीही दिग्दर्शक व लेखकाला कोणताही पुरस्कार मिळाला नव्हता.

“३० लाख रुपयांच्या बजेटमध्ये बनवलेल्या माझ्या एका भोजपुरी चित्रपटाने ५४ कोटी रुपये कमावले होते. पण या चित्रपटाच्या दिग्दर्शकाला किंवा लेखकाला कोणताही पुरस्कार मिळाला नाही. आता विष्णूने एक व्यासपीठ उपलब्ध करून दिलंय, ज्याद्वारे आम्ही सर्व एकमेकांना ओळखू लागलो. मला विश्वास आहे की INCA हे एक मोठं पाऊल आहे आणि ते आणखी मोठे यश मिळवेल,” असं मनोज तिवारी म्हणाले.

मनोज तिवारी कोणत्या चित्रपटाबद्दल बोलत होते?

मनोज तिवारी यांच्या या वक्तव्यानंतर त्यांच्या चित्रपटाबद्दल चर्चा सुरू झाली आहे. चाहत्यांच्या मते, ते ‘ससुरा बड़ा पैसावाला’ सिनेमाबद्दल बोलत होते. ‘ससुरा बड़ा पैसावाला’ भोजपुरी इंडस्ट्रीतील ब्लॉकबस्टर चित्रपट होता. या चित्रपटाला लोकांचं प्रचंड प्रेम मिळालं होतं. २००३ मध्ये रिलीज झालेल्या या चित्रपटात मनोज तिवारीबरोबर रानी चॅटर्जी मुख्य भूमिकेत होती. या चित्रपटाने तब्बल ५४ कोटी रुपये कमावले होते. हा चित्रपट तुम्ही आता युट्यूबवर पाहू शकता.

‘गँग्स ऑफ वासेपुर २’, ‘देश द्रोही’ शाहरुख खानचा ‘फॅन’ या बॉलीवूड चित्रपटांमध्ये काम करणाऱ्या मनोज तिवारींनी भोजपुरी इंडस्ट्री गाजवली आहे. त्यांनी अनेक अॅक्शन चित्रपट केले. मनोज तिवारींना ‘ससुरा बड़ा पैसावाला’मधूनच लोकप्रियता मिळाली. मग त्यांनी ‘धरती कहे पुकार के’, ‘बंधन टूटे ना’, रानी चॅटर्जीबरोबर ‘दामाद जी’, मिथुन चक्रवर्तीबरोबर ‘भोले शंकर’, ‘राजा ठाकूर’, ‘इंटरनेशनल दरोगा’, ‘परमवीर परशुराम’ व ‘गंगा जमुना सरस्वती’ हे हिट चित्रपटही केले होते.