“रसवंती यंत्रात हात गेला, ५०-६० टाके…”, ‘चला हवा येऊ द्या’ फेम कलाकाराने सांगितला अपघाताचा प्रसंग, म्हणाला, “लक्ष नसताना…”

‘चला हवा येऊ द्या’ शोपूर्वी त्यांनी झी मराठीवरीलच ‘फु बाई फु’ या शोमध्ये स्पर्धक म्हणून काम केलेले. त्यापूर्वी करिअरच्या सुरुवातीच्या काळात ते दूरदर्शनवरील मालिकांमध्ये काम करायचे. वेळ पडल्यास त्यांनी मेकअप आर्टिस्ट म्हणूनही काम केले आहे. अशातच त्यांनी इंडस्ट्रीत येण्याआधीचा संघर्ष सांगितला आहे.

लोकमत फिल्मीला दिलेल्या मुलाखतीत भारत गणेशपुरे यांनी मनोरंजन विश्वात येण्याआधीचा काळ सांगितला. भारत यांची रसवंती होती. याच रसवंतीवर एकदा त्यांचा अपघात झाला होता. याबद्दल ते म्हणाले, “मी कधी नोकरी केली नाही. माझी रसवंती होती. तेव्हा गावी दुपारी फार कुणी येत नसत. बँकेचे काही कर्मचारी होते. ते जेवण करून रस प्यायला यायचे. त्यानंतर आम्ही मशीन धुवून दुपारी साडेचार पर्यंत वगैरे निवांत असायचो. एकदा मशीन धुत असताना कुणीतरी आवाज दिला आणि काहीतरी झालं. तर माझं लक्ष नसताना मशीन मध्ये हात गेला आणि बोटांना जखम झाली. त्यानंतर हाताला पन्नास-साठ टाके लागले. मला वाटलं बोटे तोडतात की काय… पण हाडे शिल्लक होती; तर डॉक्टरांनी टाके मारले. त्यामुळे हातात फार काही ताकद नाही. मी हातांनी जड सामान उचलू शकत नाही.”

यापुढे त्यांनी पशुवैद्यकीय डॉक्टर व्हायचे होते अशी इच्छाही व्यक्त केली. याबद्दल भारत गणेशपुरे म्हणाले, “मी अभ्यासात हुशार होतो. मला पशुवैद्यकीय डॉक्टर व्हायचे होते. पण माझे पशुवैद्यकीय डॉक्टर बनण्यासाठीचे अॅडमिशन तीन मार्कांनी हुकलं.”

भारत यांना बालपणापासूनच अभिनयाची आवड होती. त्यामुळे गावागावात जेव्हा ऑर्केस्ट्रा व्हायचे तेव्हा ते त्यात आवडीने सहभाग घ्यायचे. अभिनयातली आवड जपण्यासाठी त्यांनी मुंबईला येण्याचं ठरवलं पण यासाठी घरच्यांकडून परवानगी मिळावी म्हणून त्यांनी एमपीएससीची परीक्षा देण्यासाठी मुंबईला येत असल्याचे सांगितले. यानंतर त्यांनी मुंबईत आपला संघर्षा केला. पुढे मालिका, शो आणि सिनेमांमधून त्यांनी प्रेक्षकांचे मनोरंजन केले आहे.

दरम्यान, लवकरच त्यांचा ‘सालबर्डी’ नावाचा सिनेमा प्रेक्षकांच्या भेटीला येत आहे. यात त्यांच्यासह पूजा सावंत, शशांक शेंडे, अंशुमन विचारे, कमलाकर सातपुते, ओंकार भोजने यांच्यासह अनेक कलाकार मंडळी आहेत. येत्या १७ एप्रिल रोजी हा सिनेमा सर्वत्र प्रदर्शित होणार आहे.