‘दशमी’ सिनेमात दिग्गज कलाकारांची मांदियाळी! दाक्षिणात्य अभिनेत्यासह झळकणार ‘हे’ कलाकार, पाहा पोस्टर

विजय, शक्ती आणि संघर्षाची झलक दाखवणाऱ्या ‘दशमी’ चित्रपटाच्या पहिल्या पोस्टरचं अनावरण नुकतंच करण्यात आलं. प्रत्येक संघर्षातून उभा राहणारा विजय म्हणजेच खरी ‘दशमी’ हा विचार प्रभावीपणे मांडणाऱ्या या चित्रपटात महेश मांजरेकर, मकरंद अनासपुरे, विजय निकम, गौरी इंगवले, प्रसन्न केतकर, देवेंद्र गायकवाड, शाम माशाळकर, राज कुंदन आणि दाक्षिणात्य स्टार अभिनेते रवि प्रकाश असे नामवंत कलाकार झळकणार आहेत.

दिग्दर्शक योगेश भोसले याबद्दल म्हणाले, “दशमी’ हा विचार आहे, जो प्रत्येक मुलीला आणि प्रत्येक कुटुंबाला आत्मविश्वास आणि बळ देतो. ‘दशमी’ हा केवळ एक चित्रपट नाही, तर प्रत्येक माणसाच्या आयुष्यातील अन्यायाविरुद्ध उभं राहण्याच्या धैर्याचा आणि सत्याच्या विजयाचा प्रवास आहे. केवळ मनोरंजन नव्हे, तर प्रेक्षकांना विचार करायला लावणारा आणि मनात दीर्घकाळ घर करणारा हा सिनेमा असेल.”

बॉलीवूड चित्रपटांप्रमाणे भव्य दृश्यरचना आणि उच्च दर्जाचे तांत्रिक सादरीकरण हे ‘दशमी’ सिनेमाचं खास वैशिष्ट्य आहे. प्रत्येक फ्रेम बारकाईने साकारण्यात आली असून ‘दशमी’ची कथा रहस्याच्या अनेक स्तरांनी विणलेली आहे. कथानकातील धागेदोरे सहज उलगडत नाहीत. प्रत्येक टप्प्यावर नवे प्रश्न, अनपेक्षित वळणं आणि धक्कादायक खुलासे यामुळे प्रेक्षकांच्या मनात शेवटपर्यंत उत्सुकता निर्माण होईल.

या सिनेमाच्या लेखनाची आणि संगीताची जबाबदारी सुरेश पंडित यांनी सांभाळली आहे. मराठी चित्रपटसृष्टीत सस्पेन्स-क्राईम थ्रिलरचा नवा मापदंड निर्माण करण्याची क्षमता असलेला ‘दशमी’ प्रत्येक चित्रपटप्रेमीने मोठ्या पडद्यावर अनुभवावा असा अविस्मरणीय सिनेमॅटिक अनुभव असणार आहे.