खून, अन्याय अन् धक्कादायक खुलासे; ‘दशमी’ सिनेमाचा अंगावर काटा आणणारा ट्रेलर प्रदर्शित! तेलुगू अभिनेता साकारणार ‘ही’ भूमिका

विजयादशमी म्हणजे वाईटावर चांगल्याचा विजय. पण, आजच्या काळात अन्यायाविरुद्ध कोण उभं राहणार? याच प्रश्नाला थरारक आणि रहस्यमय पद्धतीने भिडणारा ‘दशमी’चा प्रवास प्रेक्षकांची उत्कंठा वाढवणार आहे. ‘दशमी’ची कथा रहस्याच्या अनेक स्तरांनी विणलेली आहे. सुरुवातीपासून शेवटपर्यंत कथानकातील प्रत्येक धागा प्रेक्षकांना वेगवेगळ्या दिशेने घेऊन जाणार आहे. नवे प्रश्न, अनपेक्षित वळणं, वाढता तणाव आणि धक्कादायक खुलासे यामुळे पडद्यावर नेमकं पुढे काय घडणार, याचा अंदाज बांधणं कठीण होणार आहे. नुकताच या चित्रपटाचा दमदार ट्रेलर प्रदर्शित झाला आहे.

‘दशमी’ हा केवळ रहस्य आणि थराराचा खेळ नाही, तर अन्यायाविरुद्ध उभं राहण्याची ताकद देणारा विचार आहे. प्रत्येक मुलीने निर्भयपणे जगावं आणि तिच्या हक्कासाठी समाजानेही ठामपणे उभं राहावं, हा संदेश या चित्रपटातून देण्यात आला आहे, असं दिग्दर्शक योगेश भोसले सांगतात.

भव्य दृश्यरचना, दर्जेदार तांत्रिक बाजू आणि मोठ्या पडद्याला साजेसं सादरीकरण हे ‘दशमी’चं खास वैशिष्ट्य आहे. प्रत्येक फ्रेम बारकाईने साकारण्यात आली असून, मराठी सिनेमातील सस्पेन्स-क्राईम थ्रिलरला एक वेगळा अनुभव देण्याचा प्रयत्न या चित्रपटातून करण्यात आला आहे. महेश मांजरेकर, मकरंद अनासपुरे, विजय निकम, गौरी इंगवले, प्रसन्न केतकर, देवेंद्र गायकवाड, शाम माशाळकर, राज कुंदन यांच्यासह दाक्षिणात्य स्टार अभिनेते रवि प्रकाश या सिनेमात महत्त्वपूर्ण भूमिकेत झळकताना दिसणार आहेत.

आपल्या मराठी पदार्पणाबद्दल रवी प्रकाश म्हणतात, “मराठीत पहिल्यांदाच काम करताना अशी भूमिका मिळणं माझ्यासाठी खूप खास आहे. ‘एसीपी आसिफ मुजावर’ असं माझ्या पात्राचं नाव आहे. या भूमिकेसाठी माझ्याकडून खूप बारकाईने तयारी करून घेतली गेली. या भूमिकेतून मराठी प्रेक्षकांना माझी एक वेगळी बाजू पाहता येणार आहे, याचा आनंद आहे.”

दरम्यान, येत्या २३ ऑक्टोबरला हा ‘दशमी’ सिनेमा प्रदर्शित होणार आहे.