हर्षदा खानविलकरांसह नव्या नाटकात झळकणार ‘हे’ कलाकार! ‘स्टार प्रवाह’चा नायक प्रमुख भूमिकेत, ३ पिढ्यांची क्रेझी गोष्ट, पाहा प्रोमो

‘आमच्या पिढीची गोष्टच वेगळी!’ हे नाटक प्रिया बापट सादर करत असून याची निर्मिती नंदू कदम करत आहेत. या नाटकाचं लेखन अमोल पाटील यांनी केलं असून, दिग्दर्शनाची धुरा अद्वैत दादरकरने सांभाळली आहे.

‘आमच्या पिढीची गोष्टच वेगळी!’ या नाटकात हर्षदा खानविलकर आणि सुनील बर्वे यांच्याबरोबर कोणकोणते कलाकार झळकणार याबद्दल प्रत्येकाच्या मनात उत्सुकता निर्माण झाली होती. अखेर या नाटकाचा पहिला प्रोमो नुकताच प्रेक्षकांच्या भेटीला आला आहे. यामध्ये ३ पिढ्यांची गोष्ट मांडण्यात येणार आहेत.

हर्षदा खानविलकर व सुनील बर्वे जुन्या पिढीचे विचार, त्यांच्यात असलेलं प्रेम या गोष्टी रिप्रेझेंट करतील. तर, ९०च्या दशकातील कपल आहे शर्मिला शिंदे आणि अक्षर कोठारी. शर्मिलाने आजवर ‘पुढचं पाऊल’, ‘नवरी मिळे हिटलरला’ आणि सध्या सुरू असलेल्या ‘वीण दोघांतली ही तुटेना’ या मालिकेत निकिता ही महत्त्वपूर्ण भूमिका साकारली आहे.

तर, अक्षर कोठारीने ‘स्टार प्रवाह’च्या ‘स्वाभिमान’, ‘लक्ष्मीच्या पाऊलांनी’, ‘छोटी मालकीण’ यांसारख्या मालिकांमध्ये मुख्य नायकाची भूमिका साकारली आहे. या चौघांबरोबर वैष्णवी आंबवणे आणि शंतनू ठवळी हे नवोदित कलाकार सुद्धा या नाटकात झळकणार आहेत.

‘आमच्या पिढीची गोष्टच वेगळी!’ नाटकाचा हा पहिला प्रोमो प्रेक्षकांच्या पसंतीस उतरला आहे. मराठी कलाकारांसह चाहत्यांनी या प्रोमोवर शुभेच्छांचा वर्षाव केला आहे. लवकरच या नाटकाचे शुभारंभाचे प्रयोग पार पडतील. या नाटकाच्या निमित्ताने हर्षदा खानविलकर तब्बल दोन दशकांनंतर पुन्हा एकदा रंगभूमीवर झळकणार आहेत.