सध्या सर्वत्र ‘आली मोठी शहाणी’ या सिनेमाची चर्चा सुरू आहे. यामध्ये हृता दुर्गुळे व सारंग साठ्ये यांची फ्रेश जोडी प्रेक्षकांना पाहायला मिळणार आहे. या जोडीची धमाल केमिस्ट्री आता नुकत्याच प्रदर्शित झालेल्या गाण्याच्या माध्यमातून सुद्धा प्रेक्षकांना पाहायला मिळतेय. चित्रपटातील ‘बोनिता बोनिता’ हे गाणं प्रदर्शित झालं असून, या गाण्यात त्यांचा बिनधास्त अंदाज पाहायला मिळतोय. दोघांची एनर्जी, डान्स मूव्ह्ज आणि गाण्याचा मूड यामुळे ‘बोनिता बोनिता’ गाण्याने लक्ष वेधून घेतलं आहे.
या गाण्यात हृता आणि सारंग एकत्र थिरकताना दिसत असून त्यांची ऑनस्क्रीन जुगलबंदी गाण्याला वेगळीच रंगत देते. या गाण्याला सिद्धांत भोसले आणि केतकी माटेगावकर यांचा सुरेल आवाज लाभला आहे. तर गाण्याचे शब्द गुरू ठाकूर यांनी लिहिले असून पंकज पडघण यांनी संगीत दिलं आहे. त्यांच्या आवाजातील सहजता आणि गाण्याचा ठेका यामुळे ‘बोनिता-बोनिता’ गाणं आणखी रंजक ठरतं.
गाण्याबद्दल संगीतकार पंकज पडघण म्हणतात, “‘बोनिता बोनिता’ हे गाणं करताना आजच्या तरुणाईला आवडेल असा फ्रेश, मोकळा आणि एनर्जेटिक मूड ठेवण्याचा प्रयत्न केला आहे. सिद्धांत आणि केतकीच्या आवाजामुळे गाण्याला हवा असलेला चार्म मिळाला आहे. हे गाणं तरुणाई नक्कीच एन्जॉय करेल याची मला खात्री आहे.”
दिग्दर्शक आनंद दिलीप गोखले म्हणतात, “‘हे गाणं चित्रपटात एक फ्रेश आणि उत्साही मूड घेऊन येतं. हृता आणि सारंगची जोडी या गाण्यासाठी अगदी योग्य वाटली. दोघांनीही डान्स आणि गाण्याची एनर्जी खूप सहजपणे पकडली आहे. गाणं शूट करतानाही त्यांचा उत्साह जाणवत होता आणि तोच पडद्यावरही दिसतो.”
निर्मात्या श्रुती साठे व ईशा मुठे म्हणतात, “‘आली मोठी शहाणी’मध्ये प्रत्येक गाण्याला त्याची स्वतःची ओळख देण्याचा प्रयत्न केला आहे. ‘बोनिता बोनिता’ हे त्याचं एक सुंदर उदाहरण आहे. चित्रपटाच्या घोषणेपासूनच हृता आणि सारंगच्या जोडीची उत्सुकता होती. त्यांना या गाण्यात एकत्र आणण्याची कल्पना खूपच छान जमून आली. त्यांची जोडी या गाण्याला एक वेगळीच गंमत देते. प्रेक्षकांना हा दोघांचा नवा अंदाज नक्की आवडेल, अशी आम्हाला खात्री आहे.”
आनंद दिलीप गोखले लिखित आणि दिग्दर्शित ‘आली मोठी शहाणी’ हा सिनेमा येत्या २ ऑक्टोबरला प्रदर्शित होणार आहे. जयकुमार मुनोत, ईशा मुठे आणि श्रुती साठे हे या चित्रपटाचे निर्माते आहेत. हृता दुर्गुळे आणि सारंग साठ्ये या सिनेमात प्रमुख भूमिकेत झळकणार आहेत.
