अभिनेता रितेश देशमुखचा 'वेड' चित्रपट काही दिवसांपूर्वीच प्रदर्शित झाला. या चित्रपटाने अवघ्या महाराष्ट्राला वेड लावलं आहे. चित्रपटातील गाणी तर एवढी लोकप्रिय झाली आहेत की अगदी परदेशी रील स्टार्सना या गाण्यांची भुरळ पडली आहे. संपूर्ण महाराष्ट्रासह प्रसिद्ध रील स्टार किली पॉललाही 'वेड'च्या 'वेड लावलंय' या गाण्याची भुरळ पडली आहे. या गाण्यावरील डान्सचा किली व्हिडीओ सोशल मीडियावर बराच व्हायरल होताना दिसत आहे. किली पॉल दक्षिण आफ्रिकेच्या तंजानियामधील एक प्रसिद्ध रील स्टार आहे. तो सोशल मीडियावर खूप लोकप्रिय असून त्याचे इन्स्टाग्रामवर ४ मिलियन पेक्षा जास्त फॉलोअर्स आहेत. किली पॉल भारतीय गाण्यावर रील बनवण्यासाठी खूप प्रसिद्ध आहे. आतापर्यंत त्याने अनेक बॉलिवूड गाण्यांवर रील्स बनवले आहेत. त्यानंतर त्याला रितेश देशमुखच्या 'वेड लावलंय'ची भुरळ पडली आहे. आणखी वाचा- Video: ‘सैराट’ चित्रपटाचा विक्रम मोडणाऱ्या ‘वेड’ची आर्चीला भुरळ, रिंकू राजगुरूचा ‘तो’ व्हिडीओ व्हायरल किली पॉलने 'वेड लावलंय' या गाण्यावर धम्माल डान्स केला आहे. हा व्हिडीओ शेअर करताना त्याने लिहिलं, "हे मराठी गाणं म्हणजे आयुष्य. वेड लावलंय. कोणी मराठी चाहते आहेत का इथे?" याचबरोरबर किलीने या पोस्टमध्ये सलमान खान, रितेश देशमुख, जिनिलीया देशमुख यांनाही टॅग केलं आहे. त्याचा हा व्हिडीओ प्रचंड व्हायरल झाला असून त्यावर स्वतः रितेश देशमुखनेही कमेंट केली आहे. "तुम्ही खरंच कमाल आहात. खूप सारं प्रेम" असं त्याने कमेंट करताना लिहिलं आहे. आणखी वाचा- Golden Globe Award 2023 मध्ये भारताचा डंका! ‘RRR’चं ‘नाटू नाटू’ ठरलं सर्वोत्कृष्ट ओरिजनल गाणं दरम्यान या चित्रपटाच्या टीझर ट्रेलरसह, सगळ्या गाण्यांना प्रेक्षकांनी खूप भरभरून प्रतिसाद दिला होता. त्यामुळे चित्रपटगृहातही हा चित्रपट चांगलीच कामगिरी करणार असा विश्वास सगळ्यांना होता. या चित्रपटात रितेश-जिनिलियाबरोबरच अभिनेते अशोक सराफ, शुभंकर तावडे, जिया शंकर यांच्याही महत्वपूर्ण भूमिका आहेत. प्रमाणे अभिनेता सलमान खान या चित्रपटात पाहुण्या कलाकाराच्या भूमिकेत झळकला आहे.
