बॉलीवूड अभिनेता विकी कौशलच्या ‘बॅड न्यूज’ या आगामी चित्रपटातील ‘तौबा तौबा’ गाण्याची सध्या चांगलीच चर्चा रंगली आहे. प्रसिद्ध पंजाबी गायक करण औजलाने गायलेलं ‘तौबा-तौबा’ गाणं प्रदर्शित झाल्यापासून युट्यूब ट्रेंडिंगमध्ये नंबर वनवर आहे. या गाण्याला आतापर्यंत ३१ मिलिहून अधिक व्ह्यूज मिळाले आहेत. विशेष म्हणजे ‘तौबा-तौबा’ या गाण्यात विकी कौशलने केलेल्या हूकस्टेप सगळ्यांचं लक्ष वेधून घेतलं आहे. प्रत्येकजण विकीने केलेली हूकस्टेप करताना दिसत आहे. अशातच अभिनेत्री सोनाली कुलकर्णी विकी कौशलच्या या लोकप्रिय गाण्यावर जबरदस्त डान्स करताना पाहायला मिळाली. सोनालीने हा डान्स व्हिडीओ नुकताच तिच्या इन्स्टाग्रामवर शेअर केला आहे.
“मला हा एक ट्रेंड करायचा होता. विकी कौशल तू रॉक आहेस आणि कसा?”, असं कॅप्शन लिहित सोनाली कुलकर्णीने ‘तौबा-तौबा’ गाण्यावरील डान्स व्हिडीओ शेअर केला आहे. या व्हिडीओत, सोनाली मेस्सीची जर्सी आणि दोन वेण्यांमध्ये विकी कौशलच्या गाण्यावर थिरकताना पाहायला मिळत आहे. लंडनमध्ये तिने हा डान्स केला आहे. इतर कलाकार मंडळींसह चाहत्यांनी तिच्या डान्सचं कौतुक केलं आहे.
“कुलकर्णींना जमत नाही असं होईल का?”, “कडक”, “तू ट्रेंड जिंकली आहे”, “वाह क्या बात है”, “जबरदस्त”, “भारी”, “एक नंबर”, अशा प्रतिक्रिया सोनाली कुलकर्णीच्या डान्स व्हिडीओवर चाहत्यांनी दिल्या आहेत. याआधीही सोनालीने ‘पुष्पा २: द रुल’ चित्रपटातील ‘अंगारों’ गाण्यावर जबरदस्त डान्स केला होता. तिचा हा डान्स व्हिडीओ सोशल मीडियावर तुफान व्हायरल झाला होता.
हेही वाचा – ‘आई कुठे काय करते’ फेम मधुराणी प्रभुलकरला आईने नव्हे तर सासऱ्यांनी शिकवला स्वयंपाक, म्हणाली…
दरम्यान, सोनाली कुलकर्णीच्या कामाबद्दल बोलायचं झालं, तर याचवर्षी सोनालीने दाक्षिणात्य चित्रपटसृष्टीत पाऊल ठेवलं, ‘मलाइकोट्टई वालीबान’ या चित्रपटाच्या निमित्ताने सोनाली पहिल्यांदाच मल्याळम चित्रपटसृष्टीत झळकली. २५ जानेवारीला सोनालीचा हा पहिला दाक्षिणात्य चित्रपट प्रदर्शित झाला होता. या चित्रपटातील तिच्या कामाचं चहूबाजूने कौतुक झालं. आता लवकरच ती ‘मोगलमर्दिनी छत्रपती ताराराणी’ या चित्रपटात पाहायला मिळणार आहे. या चित्रपटात सोनाली स्वराज्य सौदामिनी छत्रपती ताराराणी या मुख्य भूमिकेत झळकणार आहे.
