‘या’ मराठी चित्रपटाने रचला इतिहास, प्रदर्शनापूर्वीच कमावले कोट्यवधी रुपये; कधी होणार रिलीज? वाचा…

चित्रपटाने रचला इतिहास!

‘गुलाबी’ या चित्रपटाची गेल्या काही दिवसांपासून मोठी चर्चा असल्याचे पाहायला मिळत आहे. मृणाल कुलकर्णी, आश्विनी भावे आणि श्रुती मराठे या चित्रपटात मुख्य भूमिकेत दिसत आहेत. तीन स्त्रियांची गोष्ट यामध्ये पाहायला मिळणार आहे. मात्र, प्रदर्शित होण्याआधीच चित्रपटाने इतिहास रचला आहे. तो नेमका काय, हे जाणून घेऊयात.

प्लॅनेट मराठी, व्हायलेट मोशन पिक्चर्स आणि साई पियुष म्युझिक या तीन इन्स्टाग्राम चॅनेलने सोशल मीडियावर एक पोस्ट शेअर केली आहे. या पोस्टमध्ये प्रदर्शित होण्याआधीच चित्रपटाने एक कोटी रुपयांची कमाई केल्याचे म्हटले आहे. महत्त्वाचे म्हणजे, प्रदर्शित होण्याआधी इतकी कमाई करणारा ‘गुलाबी’ हा पहिला मराठी सिनेमा ठरला असल्याचे या पोस्टमध्ये म्हटले आहे.

सुरुवातीला ‘गुलाबी’ चित्रपटाचा टीझर प्रेक्षकांच्या भेटीला आला. यामध्ये राजस्थानमधील दृश्य पाहायला मिळत आहे. यामध्ये आश्विनी भावे, श्रुती मराठे आणि मृणाल कुलकर्णी एकमेकींच्या मैत्रिणी असल्याचे दिसत आहे. एकीकडे त्या मजा मस्ती करताना दिसतात, तर दुसरीकडे प्रत्येकीच्या खासगी आयुष्यात काही ना काही चालू असल्याचे पाहायला मिळते. तर त्यानंतर ‘गुलाबी’ चित्रपटाचा ट्रेलर प्रेक्षकांच्या भेटीला आला. ट्रेलरच्या सुरुवातीलाच श्रुती आणि मृणाल यांच्या पात्रांमध्ये वाद झालेला पाहायला मिळतो. मृणाल रस्त्यावर वाट बघत उभी असते, श्रुती तिथून गाडीवरून जाते, त्यावेळी मृणालच्या अंगावर खड्ड्यातील पाणी उडते आणि त्यांच्यात वाद होतो. राजस्थानमध्ये पुन्हा त्यांची मैत्री झालेली दिसते. आता ही मैत्री कशी होणार, चित्रपटात नक्की कोणती गोष्ट दिसणार हे पाहण्यासाठी प्रेक्षक उत्सुक असल्याचे दिसत आहे.

हेही वाचा: “एका काकूंनी त्यांच्या मुलीची ओळख करून दिली अन्…”; ‘आई कुठे काय करते’ फेम अभिषेक देशमुखने सांगितला किस्सा, म्हणाला, “हा यश…”

‘गुलाबी’ हा चित्रपट २२ नोव्हेंबर २०२४ ला प्रदर्शित होणार आहे. आता प्रदर्शित झाल्यानंतर प्रेक्षकांना हा सिनेमा आवडणार का आणि चित्रपट किती कमाई करणार हे पाहणे महत्त्वाचे ठरणार आहे.