चेहऱ्यावर करारी भाव अन् बंडाची ठिणगी! महेश मांजरेकरांच्या ‘बंडखोर’चे पोस्टर रिलीज, ६ अभिनेत्रींचा बेधडक अंदाज

पोस्टरमध्ये छाया कदम, प्रियदर्शनी इंदलकर, मृणाल कुलकर्णी, पूजा कातुर्डे, तितिक्षा तावडे आणि नित्यश्री ज्ञानलक्ष्मी या सहा जणी एका वेगळ्याच रुबाबात दिसत आहेत. त्यांच्यातील आत्मविश्वास त्यांच्या देहबोलीतून जाणवतो. त्यांची ही बंडखोरी नेमकी कशा विरोधात आहे, त्यांचा हा बेधडकपणा कुठून आला आणि त्यांच्या या वृत्तीमुळे कथेत काय घडणार? हे पाहणं महत्त्वाचं ठरेल.

‘बंडखोर’ हे या सहा पात्रांच्या स्वभावाचीच ओळख असल्याचं पोस्टरवरून स्पष्ट होतं. अन्यायाविरोधात आवाज उठवणं, मनाविरुद्ध गोष्टींना ठामपणे नकार देणं आणि आपल्या आयुष्याचे निर्णय स्वतः घेणं, ही या सहा जणींची वृत्ती आहे. त्यामुळे बंडखोरी हा त्यांच्या व्यक्तिमत्त्वाचाच भाग आहे. या सहा जणींचा वेगळा स्वभाव आणि बेधडक वृत्ती दाखवणारं हे पोस्टर चित्रपटाबद्दलचे कुतूहल वाढवत आहे.

पाहा बंडखोर चित्रपटाचे पोस्टर

दिग्दर्शक महेश मांजरेकर म्हणतात, “‘बंडखोर’मधल्या या सहा जणी केवळ पडद्यावरची पात्रं नाहीत, तर आपल्या आजूबाजूला दिसणाऱ्या अनेक स्त्रियांचं प्रतिनिधित्व करतात. त्यांच्या स्वभावातच एक स्पष्टपणा आहे. चुकीचं वाटत असेल तर त्या त्याला विरोध करतात आणि स्वतःच्या आयुष्याबाबतचे निर्णय घेताना कुणाच्या परवानगीची वाट पाहात नाहीत. त्यांची ही बेधडक वृत्ती, त्यांचे वेगळे स्वभाव आणि आयुष्याकडे पाहाणयाचा त्यांचा दृष्टिकोन या सगळ्यामुळे ‘बंडखोर’ची गोष्ट माझ्यासाठी खूप खास आहे.”

सहन करणं आणि गप्प राहाणं या पारंपरिक चौकटी मोडीत काढत स्वतःसाठी उभं राहणाऱ्या ६ स्त्रियांची गोष्ट सांगणाऱ्या ‘बंडखोर’ या आगामी मराठी चित्रपटाचे नवीन पोस्टर प्रेक्षकांच्या भेटीला आले आहे. दिग्दर्शक महेश मांजरेकर यांच्या या चित्रपटात छाया कदम, प्रियदर्शनी इंदलकर, मृणाल कुलकर्णी, पूजा कातुर्डे, तितिक्षा तावडे आणि नित्यश्री ज्ञानलक्ष्मी या सहा अभिनेत्री बेधडक रुबाबात दिसत आहेत. संजय शेटये आणि विनसन ग्राफिक प्रोडक्शन निर्मित हा चित्रपट येत्या २४ सप्टेंबरला चित्रपटगृहात प्रदर्शित होणार आहे.