Mrinal Kulkarni Mother Veena Dev Passed Away : सुप्रसिद्ध लेखिका, समीक्षक तसेच अभिजात साहित्य लीलया हाताळणाऱ्या डॉ. वीणा देव यांचं अल्पशा आजाराने मंगळवारी ( २९ ऑक्टोबर ) निधन झालं आहे. त्या लोकप्रिय मराठी अभिनेत्री मृणाल कुलकर्णी यांच्या आई, तर लेखक गो. नी. दांडेकर यांच्या कन्या होत्या. वीणा देव यांनी जगाचा निरोप घेतल्यावर सध्या संपूर्ण साहित्य विश्वावर शोककळा पसरली आहे.
वीणा देव पुण्यातील शाहू मंदिर महाविद्यालयात मराठी विभागप्रमुख म्हणून कार्यरत होत्या. याठिकाणी त्यांनी ३२ वर्षे अध्यापनाचं कार्य केलं. आईच्या निधनानंतर अभिनेत्री मृणाल कुलकर्णी यांनी दु:ख व्यक्त करत भावुक पोस्ट शेअर केली आहे.
हेही वाचा : ज्येष्ठ लेखिका प्रा. वीणा देव यांचे निधन
“खरंतर आता काही व्यक्त होण्याची ताकद नाही. आईला तिच्या कठीण काळात प्रेम देणाऱ्या, वेळी-अवेळी एका फोनवर धावून येणाऱ्या सगळ्यांना मनापासून धन्यवाद. मधुरा आणि मी तुमच्यामुळे हसरा चेहरा ठेवून अवघड कामगिरी पार पाडू शकलो. आईला फुलांची प्रचंड आवड. शेवटपर्यंत ती त्याच फुलांप्रमाणे चेहऱ्यावर प्रसन्न हसू ठेवून जगली. तिची उणीव जरी भासली तरी, तिने जोडलेल्या मोठ्या मित्रपरिवाराच्या आणि तिने लिहिलेल्या अनमोल कलाकृतींच्या रूपाने तिची सोबत कायम असेल. आशीर्वाद असावा!” असं लिहित मृणाल कुलकर्णी यांनी आईच्या निधनावर दु:ख व्यक्त केलं आहे.
मृणाल कुलकर्णींच्या पोस्टवर अनेकांनी दु:ख व्यक्त करत वीणा देव यांना श्रद्धांजली अर्पण केली आहे. अभिनेते-कवी सौमित्र लिहितात, “मृणाल! काय लिहू..! एक मुलगी म्हणून त्यांच्यासाठी तू अभिमानास्पद होतीस…आहेस. तुम्ही दोघींनी त्यांच्यासाठी जे जे आवश्यक आणि शक्य होतं ते ते केलंत…त्यांचा पुढला प्रवास सुंदर होवो हीच सदिच्छा..”
दरम्यान, पती डॉ. विजय देव, त्यांच्या दोन मुली मृणाल आणि मधुरा आणि जावई रुचिर कुलकर्णी ( मृणाल कुलकर्णींचे पती ) यांच्यासमवेत वीणा देव यांनी गो. नी. दांडेकर यांच्या कादंबऱ्यांच्या अभिवाचनाचे साडेसहाशेहून अधिक प्रयोग केले. याशिवाय मृण्मयी प्रकाशनातर्फे त्यांनी गो. नी. दांडेकर यांच्या दुर्मिळ साहित्यकृती देखील प्रकाशित केल्या होत्या.
