“मला आई व्हायचं नाही”, अभिनेत्री नेहा पेंडसे म्हणाली, “इतकी निराश…”

नेहा पेंडसे चित्रपटामुळे तर चर्चेत आहेच, पण त्याबरोबरच तिचे एक वक्तव्य लक्ष वेधून घेत आहे. नेहाने नुकतीच ‘राजश्री मराठी’ला मुलाखत दिली. या मुलाखतीत आई होण्याबद्दल ती काय विचार करते यावर अभिनेत्री मोकळेपणाने बोलली आहे.

“जसे मी स्वतः मध्ये काही बदल केले, तसेच त्यानेही…”

लग्नानंतर आयुष्य बदलते असे म्हणतात. तर, तुला असं वाटतं का, की व्यक्ती म्हणून तू लग्नानंतर बदललीस? त्यावर नेहा म्हणाली, “हो, मला खरंच वाटतं. माझा वैयक्तिक विकास झाला, तो लग्नानंतरच झाला. कारण- लग्नाआधी माझे खूप अफेअर्स झालेत किंवा मी खूप रिलेशनशिपमध्ये होते असं नाही. रिलेशनशिपमध्ये होते, पण ते खूप काळ चालले नाहीत. त्यामुळे मी खूप स्वतंत्र राहत होते. लग्नानंतर तसं नसतं.”

नेहा पुढे म्हणाली, “माझ्या नवऱ्याचे व्यक्तिमत्व खूप उत्तम आहे. लग्नानंतर मला स्वतःला खूप बदलावं लागलं. पण, तुम्ही ते प्रेमकरता करता आणि त्यामध्ये काही चुकीचं नाही. तुम्हाला बदल करावे लागतात. जसे मी स्वतः मध्ये काही बदल केले, तसेच त्यानेही त्याच्यामध्ये बदल केलेत. त्याशिवाय कोणतेही लग्न सुखा-सुखी टिकत नाही.”

“या सगळ्या गोष्टींचा सांभाळ मला…”

“मला याची जाणीव झाली की लग्नाआधी माझ्या आयुष्यात मला निर्णय घेण्याआधी विचारच करावा लागला नाही. कारण- मला माहित असायचं की आई-वडील तर माझ्याच बाजूने आहेत. पण ,लग्नानंतर गोष्टी बदलतात. उदाहरणार्थ, माझ्या नवऱ्याला माझ्या इंडस्ट्रीबद्दल काहीच माहित नाही. जसे की आमचे आऊटडोअप शूट्स असतात किंवा प्रमोशन असतात. त्याला याबद्दल काहीच माहित नाही. त्यामुळे, प्रत्येक वेळी त्याला समजावणे किंवा त्याची कुठेतरी अशी अपेक्षा असणे की लग्नानंतर बायको माझ्या घरी पाहिजे. तर या सगळ्या गोष्टींचा सांभाळ मला करावा लागला आणि मी तो आनंदाने केला. कारण – मी माझं प्रोफेशनल आयुष्य पुरेपूर जगले होते. मी काही विशीत लग्न केलं नाही. त्यामुळे जरी तो त्याग असला तरी तो त्याग वाटत नाही.”

आधीपासून जे लग्नाचे वय ठरवून दिलेलं आहे. ते ओलांडून जर आपण लग्न केलं, तेव्हा आपल्या विचारांची समज वाढलेली असते. आपल्याला नक्की काय हवंय, काय नकोय हे माहीत असतं. थोडं उशिरा लग्न करणं हा योग्य निर्णय असतो का? यावर नेहा म्हणाली, ” हे सगळ्यांकरता लागू नाही. मी लहानपणापासून काम करत असल्याने माझं आयुष्य वेगळं असल्याने, मी महत्वकांक्षी असल्याने आणि अशा इतर काही कारणांमुळे मला हे योग्य वाटलं.”

“एकतर आपण जी इंडस्ट्री निवडली आहे. त्यामध्ये ठरवलेली वेळ नसल्याने आपल्याला पर्याय नाही. पण प्रत्येक करिअरची इतकी मागणी नसते. प्रत्येक मुलीने इतकं महत्त्वकांक्षी असणे गरजेचे नसते. काही मुलींना मातृसुखात त्यांची वाढ दिसते, विकास दिसतो. जीवनाचा उद्देश दिसतो. तर, त्यामुळे एकच गोष्ट सगळ्यांना लागू होईल असे नाही. फक्त मला एक असं वाटतं की, प्रत्येक मुलीने तिला काय हवंय हे जाणून घेण्यासाठी एका ठराविक वयापर्यंत थांबलं पाहिजे. अगदी विसाव्या किंवा एकविसाव्या वर्षी लग्न करू नये.”

“तुमच्या आजूबाजूला जे काही घडत असतं त्यावरून तुम्ही निर्णय घेता. तुमचा जन्म अशा एखाद्या घरामध्ये झाला असेल, जिथे सतत माझ्या आईने, काकूने, आजीने हे केले आहे असं सांगितलं जात असेल. तर तुम्ही वेगळ्या पद्धतीने विचार करू शकत नाही. त्यासाठी तुमच्या मनात जे आहे ते तुम्ही थोडसं करावं. मग तुम्हाला वाटू शकते की, मी इतर गोष्टी केल्या पण मला आई बनण्यात आनंद आहे. तर त्यामध्ये काही चुकीचे नाही. पण त्याआधी जे स्वतंत्र असण्याची सुंदरता आहे ती अनुभवा. आई झाल्यानंतरही ती स्वतंत्रता अनुभवू शकता. सगळ्याचा अनुभव घ्यावा आणि स्वतःचे निर्णय घ्यावेत.”

“…तेव्हा मी आई होऊ शकले नाही”

तुझ्या प्लॅन्समध्ये आई होणं आहे का? असे विचारल्यानंतर नेहा नाही म्हणाली. अभिनेत्री म्हणाली, “मी माझे बीजांड गोठवले (Eggs Freeze) आहेत. लग्नानंतर मला एका पॉईंटला वाटलं होतं की मला आई व्हायचं आहे. तेव्हा मी आई होऊ शकले नाही, आई झाले नाही. त्या सगळ्या प्रोसेस मध्ये मी इतकी निराश झाले की मला वाटलं की मला आता आई व्हायचं नाही. तेव्हा मी विचार केला की कदाचित आता माझ्या मनामध्ये राग आहे. पण मी माझे बीजांड गोठवून ठेवते. बघूयात पुढे वाटलं तर आई होता येईल. पण, मला वाटतं आता मला आई व्हायचं नाही. मला ती जबाबदारी नकोय”, असे म्हणत अभिनेत्रीने तिला आता आई व्हायचं नाही असे सांगितले.