“आम्ही म्हणूनच तुला बोल्ड, बिनधास्त…”, सई ताम्हणकरने ‘कान्स’ एन्ट्रीचं कौतुक केल्यावर प्राजक्ता माळी म्हणाली, “एक स्त्री जेव्हा…”

सईने भर मुलाखतीत कौतुक केल्यावर आता प्राजक्ता माळीने तिचे आभार मानत एक खास पोस्ट शेअर केली आहे. प्राजक्ता म्हणते, “…आणि म्हणूनच सई आम्ही सगळे तुला बोल्ड, बिनधास्त आणि ब्युटीफूल म्हणतो! सई…तुला खूप प्रेम. कारण, एक स्त्री जेव्हा दुसऱ्या स्त्रीच्या पाठिशी खंबीरपणे उभी राहते…इथूनच खऱ्या स्त्री सक्षमीकरणाची सुरुवात होते.”

“अशा बाबतीत अनेकजण काहीच बोलत नाहीत. त्यांनी गप्प राहणं पसंत केलं, तर काहींनी फक्त तोंडावर कौतुक केलं आणि माझ्या पाठीमागे वेगळंच वागले. जे लोक काहीही झालं तरी आपलं स्पष्ट मत मांडतात अशा सगळ्यांचा मी कायम आदर करते आणि यापुढेही करत राहीन.” असं प्राजक्ताने तिच्या पोस्टमध्ये म्हटलं आहे.

सई ताम्हणकर काय म्हणाली होती?

लाडक्या मैत्रिणीला पाठिंबा देत सई ताम्हणकर म्हणाली होती, “एक गोष्ट मी आवर्जून नमूद करते…मला प्राजक्ता माळीचा खूप-खूप अभिमान आहे. मला असं वाटतं…ज्या सुंदर पद्धतीने तिने स्वत:ला कान्सच्या रेड कार्पेटवर सादर केलं, ते खूप भारी होतं. अर्थात ज्यामुळे खूप लोकांना मिरची लागलेली आहे कारण, तिच्याकडे खूप लोकांचं लक्ष आहे…आणि मला तुझा खूप अभिमान वाटतोय प्राजक्ता! माणसं काहीही केलं तरी बोलतात, आता तक्रारी करण्यापेक्षा एखाद्याचं यश आपण सेलिब्रेट केलं पाहिजे.”

दरम्यान, रेड कार्पेटवर एन्ट्री घेतल्यावर प्राजक्ताच्या चेहऱ्यावर प्रेक्षकांना कमालीचा आत्मविश्वास पाहायला मिळाला. मोरपिशी रंगाची नऊवारी साडी, त्यावर भरजरी शेला, गळ्यात ठुशी, हातात मराठमोळे तोडे, कमरपट्टा असा पारंपरिक साज करून प्राजक्ता कान्सच्या रेड कार्पेटवर चालली.