१० वर्षांचं स्वप्न अखेर साकार! रितेश देशमुखच्या ‘राजा शिवाजी’ सिनेमाचा टीझर प्रदर्शित, पत्नी जिनिलीया साकारणार ‘ही’ भूमिका

“आई जगदंबेचं स्मरण करून…”, रितेशची भावनिक पोस्ट

टीझर शेअर करताना रितेशने खास पोस्ट लिहित आपल्या भावना व्यक्त केल्या आहेत. गेल्या दहा वर्षांपासून रितेश या सिनेमासाठी मेहनत घेतोय. त्याचा हा ड्रीम प्रोजेक्ट आहे. रितेश लिहितो, “हे हिंदवी स्वराज्य व्हावे, ही तर श्रींची इच्छा!!! १० वर्षे एका महाकाय स्वप्नाला उराशी बाळगून ते सत्यात उतरवण्याचा प्रयत्न केला. लक्षात आलं..छत्रपती शिवाजी महाराज नावाचं हे आकाश जितकं दिसतं त्यापेक्षा कितीतरी भव्य आहे. आम्ही पाहिलेल्या स्वप्नाची पहिली झलक तुमच्यासमोर ठेवताना मला अभिमान वाटतो आहे. आपला राजा, आपला अभिमान! आई जगदंबेचं स्मरण करून मोहिमेचा पहिला भंडारा उधळत आहे. हर हर महादेव!”

संजय दत्त, अभिषेक बच्चन, महेश मांजरेकर, सचिन खेडेकर, भाग्यश्री, फरदीन खान, जितेंद्र जोशी, अमोल गुप्ते, विद्या बालन अशा दिग्गज कलाकारांची ‘राजा शिवाजी’ सिनेमात मांदियाळी आहे. रितेश देशमुख यामध्ये छत्रपती शिवाजी महाराजांची भूमिका साकारणार आहे. तर, त्याची पत्नी जिनिलीया देशमुख या सिनेमात सईबाईंच्या भूमिकेत झळकणार आहे.

सिनेमात शहाजीराजे भोसलेंच्या भूमिकेत अभिनेते महेश मांजरेकर आणि राजमाता जिजाऊंची भूमिका अभिनेत्री भाग्यश्री साकारणार आहे. याशिवाय अभिषेक बच्चन संभाजीराजे शहाजीराजे भोसले यांच्या भूमिकेत झळकताना दिसेल.

‘राजा शिवाजी’ चित्रपटाला अजय-अतुल यांचं संगीत लाभलं आहे. टीझरच्या शेवटी बॅकग्राऊंडला वाजणारं “छत्रपती” गाणं सर्वांचं लक्ष वेधून घेतं. त्यामुळे ‘राजा शिवाजी’ सिनेमाचं संगीत प्रेक्षकांसाठी मोठी पर्वणी ठरेल. याशिवाय आंतरराष्ट्रीय ख्यातीचे छायाचित्रकार संतोष सिवन यांची सिनेमॅटोग्राफी या सिनेमात प्रेक्षकांना पाहायला मिळेल.

जिओ स्टुडिओज प्रस्तुत आणि मुंबई फिल्म कंपनी या बॅनरखाली ज्योती देशपांडे व जिनिलीया देशमुख यांनी या सिनेमाची निर्मिती केली आहे. ‘राजा शिवाजी’ हा चित्रपट १ मे २०२६ रोजी जगभरातील चित्रपटगृहांमध्ये मराठी, हिंदी आणि तेलुगू भाषांमध्ये प्रदर्शित होणार आहे.