अभिनेत्री साजिरी जोशीचा ‘या’ पुरस्काराने गौरव; आई ऋजुता देशमुख म्हणाली, “आमच्या लेकीला…”

साजरीचा हा पहिला चित्रपट असला तरी तिने तिच्या अभिनयातून, तिच्या भूमिकेतून सर्वांची मने जिंकली. चित्रपटात उन्हाळ्याची सुट्टी, कोकण, तीन मित्रांनी उन्हाळ्याच्या सुट्टीत ठरवलेला प्लॅन आणि जाईच्या एन्ट्रीमुळे त्यांच्या प्लॅनमध्ये झालेला बदल अशा अनेक गोष्टी पाहायला मिळतात. प्रेक्षकांचे मन उन्हाळ्याच्या सुट्ट्यांमध्ये रमते.

मित्रांची मैत्री पाहायला मिळते. रुसवे-फुगवे पाहायला मिळतात आणि आपापसातलं प्रेमही पाहायला मिळतं, त्यामुळे या चित्रपटाची आजही चर्चा होताना दिसते. हा चित्रपट जेव्हा ॲमेझॉन प्राईम या ओटीटी प्लॅटफॉर्मवर प्रदर्शित झाला, त्यावेळीदेखील चित्रपटाला प्रेक्षकांचा प्रचंड प्रतिसाद मिळाला.

‘एप्रिल मे 99’ या चित्रपटानंतर साजिरी जोशी ‘बाई तुझ्या पायी’ या वेब सीरिजमधून प्रेक्षकांच्या भेटीला आली. निपुण धर्माधिकारी दिग्दर्शित या वेब सीरिजमधील तिची भूमिका प्रेक्षकांच्या पसंतीस पडल्याचे पाहायला मिळाले. झी ५ वर प्रदर्शित झालेल्या या वेब सीरिजमध्ये क्षिती जोग, शिवराज वायचळ आणि इतर अनेक लोकप्रिय कलाकार महत्त्वाच्या भूमिकांत दिसले.

साजिरी जोशीचा गौरव

साजिरी जोशी आता चर्चेत येण्याचे कारण म्हणजे तिला नुकताच झी चित्र गौरवचा प्रतिभाशाली सर्वोत्कृष्ट पदार्पण हा पुरस्कार मिळाला आहे. त्यानंतर तिच्यावर कौतुकाचा वर्षाव होताना दिसत आहे.

साजिरी जोशीची आई म्हणजेच लोकप्रिय अभिनेत्री ऋजुता देशमुखने देखील सोशल मीडियावर एक पोस्ट शेअर केली आहे.
साजिरीचे आणि तिच्याबरोबरचे काही फोटो शेअर करत अभिनेत्रीने लेकीवर कौतुकाचा वर्षाव केला आहे.

तिने लिहिले, “अभिमानाचा आणि कौतुकाचा क्षण. पहिला चित्रपट, पहिलं बक्षीस, भरपूर कौतुक आणि प्रेक्षकांचे प्रेम.”

पुढे तिने लिहिले, “आमच्या लेकीला साजरी जोशीला झी चित्र गौरवचा प्रतिभाशाली सर्वोत्कृष्ट पदार्पण अभिनेत्री पुरस्कार मिळाला. परीक्षकांचे, झी कुटुंबाचे आणि प्रेक्षकांचे मनापासून आभार”, असे लिहित अभिनेत्रीने मुलीचे कौतुक केले.

ऋजुता देशमुखने दिग्दर्शक रोहन मापुस्कर यांचे आभार मानत लिहिले, “अत्यंत महत्त्वाची व्यक्ती रोहन मापुस्कर आणि ‘एप्रिल मे 99’ची संपूर्ण टीम यांच्याशिवाय हे सगळं अशक्य होतं. तुम्हा सगळ्यांचे मनापासून आभार.”

अभिनेत्रीच्या पोस्टवर अनेक कलाकारांनी कमेंट करत साजिरीचे कौतुक केले आणि तिच्यावर शुभेच्छांचा वर्षाव केला आहे.

दरम्यान, साजरी जोशी सध्या ‘छोटे उस्ताद’ या कार्यक्रमाच्या चौथ्या पर्वाचे सूत्रसंचालन करत आहे; तर ऋजुता देशमुख स्टार प्रवाह वरच्या ‘लग्नानंतर होईलच प्रेम’ या मालिकेत महत्त्वाच्या भूमिकेत दिसत आहे.