गेल्या वर्षी अनेक ऐतिहासिक चित्रपट प्रेक्षकांच्या भेटीला आले. तिला अनेक चित्रपटांना प्रेक्षकांनी तुफान प्रतिसाद दिला. तर या वर्षी देखील काही ऐतिहासिक चित्रपट प्रदर्शित होणार आहेत. सर्व चित्रपटांची वेगवेगळ्या कारणाने प्रेक्षक आतुरतेने वाट पाहत आहेत. यातीलच एक चित्रपट म्हणजे रावरंभा. काही महिन्यांपूर्वी या चित्रपटाची घोषणा करण्यात आली होती. या चित्रपटात छत्रपती शिवाजी महाराजांच्या भूमिकेत कोण दिसणार हे जाणून घेण्यासाठी प्रेक्षक उत्सुक होते. आता हे नाव समोर आलं आहे.
अभिनेता शंतनू मोघे या चित्रपटामध्ये छत्रपती शिवाजी महाराजांच्या भूमिकेत दिसणार आहे. याआधी त्याने ‘स्वराज्यरक्षक संभाजी’ या मालिकेमध्ये छत्रपती शिवाजी महाराजांची भूमिका साकारली होती. त्या भूमिकेसाठी त्याचं खूप कौतुक झालं. त्यानंतर आता पुन्हा एकदा तो छत्रपती शिवाजी महाराजांची भूमिकेतून प्रेक्षकांच्या भेटीला येणार आहे. शिवजयंतीच्या निमित्ताने ‘रावरंभा’ चित्रपटातील छत्रपती शिवाजी महाराजांचे पोस्टर प्रदर्शित झालं आहे.
आणखी वाचा : प्रसाद ओक लवकरच दिसणार स्वातंत्र्यवीर सावरकरांच्या भूमिकेत? प्रसिद्ध दिग्दर्शकाची ‘ती’ पोस्ट चर्चेत
याबाबत बोलताना तो म्हणाला, “मी छोटया पडद्यावर ‘स्वराज्यरक्षक संभाजी’ मालिकेत साकारलेल्या छत्रपती शिवाजी महाराजांच्या भूमिकेला प्रेक्षकांचं भरभरून प्रेम मिळालं होतं. या भूमिकेचं गारुड आजही प्रेक्षकांच्या मनात असताना आता मोठ्या पडद्यावरही छत्रपती शिवाजी महाराजांची भूमिका साकारायला मिळाल्याचा आनंद आहे. ‘रावरंभा’ हा अतिशय भव्यदिव्य व थक्क करणारा चित्रपट आहे. अभिनेता म्हणून मी स्वतःला खूप भाग्यशाली समजतो की, ‘रावरंभा’ चित्रपटात मला शिवाजी महाराजांची भूमिका साकारायला मिळतेय. ज्या उत्तुंग व्यक्तीमत्त्वाने आपला प्रेरणादायी इतिहास घडवला, समाजाला नवा विचार दिला, त्यामुळे अशी भूमिका साकारताना सोबत मोठी सामाजिक जबाबदारी नक्कीच असते.”
हेही वाचा : ‘पटकन गाडीतून उतरलो आणि..’; ‘स्वराज्यरक्षक संभाजी’ मालिकेतील शंतनूची खास पोस्ट वाचाच
शशिकांत पवार प्रोडक्शन अंतर्गत येणाऱ्या ‘रावरंभा’ या चित्रपटाच्या दिग्दर्शनाची धुरा अनुप जगदाळे यांनी सांभाळली आहे. ‘रावरंभा’ चित्रपटाची पटकथा आणि संवाद प्रताप गंगावणे यांचे आहेत. हा चित्रपट ७ एप्रिल २०२३ रोजी प्रदर्शित होईल.
