scorecardresearch

“नेतेमंडळी दहीहंडीसारख्या हिंदू कार्यक्रमाला शाहरुख खानला बोलवतात, तेव्हा…” मराठी दिग्दर्शकाचा राम कदमांना टोला

“ते त्यांना चालतं आणि त्यांच्या पक्षालाही”, असेही ते म्हणाले.

“नेतेमंडळी दहीहंडीसारख्या हिंदू कार्यक्रमाला शाहरुख खानला बोलवतात, तेव्हा…” मराठी दिग्दर्शकाचा राम कदमांना टोला
महेश टिळेकर राम कदम

प्रसिद्ध निर्माते आणि दिग्दर्शक महेश टिळेकर हे गेल्या काही दिवसांपासून सातत्याने चर्चेत आहेत. काही दिवसांपूर्वी महेश टिळेकर यांनी शरद पोंक्षे आणि स्वप्नील जोशी यांच्याबद्दल एक पोस्ट लिहिली होती. त्यानंतर आता त्यांनी थेट हिंदुत्वावर भाष्य केले आहे. यात त्यांनी बेगडी हिंदुत्व दाखवणाऱ्यांना राजकीय नेत्यांना सणसणीत चपराक लगावली आहे. त्याबरोबरच त्यांनी राम कदमांना अप्रत्यक्ष टोलाही लगावला आहे.

महेश टिळेकर हे कायमच समाजातील ज्वलंत विषय आणि समस्यांवर भाष्य करत करतात. अनेकदा त्यांच्या या विचारांमुळे त्यांना ट्रोलिंगही सहन करावे लागते. सध्या हिंदुत्वाच्या मुद्द्यावर राजकारण चांगलेच तापले आहे. अनेक मुद्द्यांवर हिंदुत्ववादी संघटना आक्रमक होताना दिसत आहेत. सध्या शाहरुख खानच्या पठाण चित्रपटातील बेशरम या गाण्यावरुन वातावरण तापले आहे. या गाण्यात दीपिका पदुकोणने भगव्या रंगाची बिकीनी परिधान केली आहे. त्यावरुन हा वाद सुरु झाला आहे. या सगळ्याचा हिंदुत्वाशी काहीच संबंध नसताना राजकारण केले जात आहे. आता यावरच आता दिग्दर्शक महेश टिळेकर यांनी सडेतोड भाष्य केले आहे.
आणखी वाचा : “पोंक्षे, जोशी या कलाकारांनी हिंदू धर्मासाठी…” मराठी दिग्दर्शकाची टीकात्मक पोस्ट

महेश टिळेकरांची पोस्ट

“हिंदुत्व आणि हिंदुत्वासाठी दिलेल्या योगदानाबद्दल स्वप्नील जोशी, शरद पोंक्षे यांना देण्यात आलेल्या पुरस्काराबद्दल मी दोन एक दिवसांपूर्वी पोस्ट लिहिली होती. त्याच पोस्ट मध्ये मी हिंदूंच्या वैष्णोदेवी मंदिरात जाऊन नतमस्तक होणारा शाहरुख खान आणि स्वतः च्या ऑफिस मध्ये हिंदू पद्धतीने पूजा विधी करणारा आमिर खान यांनी स्वतः मुस्लिम धर्मीय असूनही हिंदू धर्माचा आदर केल्याबद्दल कोणती संघटना यांना पुरस्कार देईल का ? असा प्रश्न केला होता.

ही पोस्ट नंतर मी डिलीट केली, त्याला कारण म्हणजे काहींनी जातीवरून कमेंट्स करणाऱ्या एकमेकांचा उद्धार सुरू केला होता, एकतर मी स्वतः जात मानत नाही म्हणून आणि एका विद्वानाने कमेंट्स मधून शाहू फुले आंबेडकर यांचा चुकीच्या पद्धतीने उल्लेख केला जो मला आवडला नाही.

शाहरुख खान, आमिर खान यांच्या बाजूने वक्तव्य केल्यामुळे कंत्राटी पद्धतीने कमेंट्स मधून ट्रोल करण्याचे काम करणाऱ्या बेरोजगारांनी मला हिंदुत्व म्हणजे काय हे माहीत नसल्याचा आरोप केला. काहींनी दीपिका पदुकोण ने घातलेल्या भगव्या ड्रेस वरून हिंदूंचा झालेला अपमान तुम्हाला चालतो का असा प्रश्न केला. दोन दिवसांपू्वी प्रसिद्ध अभिनेता रजनीकांत ने हिंदू असूनही संगीतकार रेहमान याच्या बरोबर एका दर्ग्यावर जाऊन दर्शन घेतले, त्यावेळी त्याच्या आणि रेहमानच्या खांद्यावर भगव्या रंगाचे उपरणे, डोक्यावर भगव्या रंगाचे मुंडासे दिसत आहे. आता या दोघांना पण हिंदूंचा अपमान केला म्हणून कुणी नावं ठेवली तर चुकीचं नाही का???

1)मुस्लिम असूनही फुटपाथ वरील छोट्या हिंदू मुलीला घरात आणून तिला मुलगी मानून तिला वाढवणारे सलमानचे वडील सलीम खान,

2) नातेवाईकांचा विरोधाला बळी न पडता, स्वतः ची श्रद्धा आहे म्हणून गणेशोत्सवात घरी गणपतीची प्रतिष्ठापना करून दहा दिवस गणपतीची आरती,पूजा करणारी पुण्यातील मुस्लिम महिला,

3) मराठी रंगभूमीवर आपल्या आवाजाने, अभिनयाने ठसा उमटविणाऱ्या आणि नाट्यसंगीतात मोलाचं योगदान देणाऱ्या ज्येष्ठ अभिनेत्री फय्याज शेख या पुण्यात आल्यावर दगडूशेठ गणपतीच्या दर्शनाला जातात,पुढे दत्तमंदिरात ही जातात. मी त्यांच्या मुंबईतील घरी एकदा गेलो होतो तेंव्हा हिंदू देवी देवतांचे फोटो, मूर्ती त्यांच्या घरात दिसल्या. नियमित त्या पोथ्या , स्वामी चरित्र वाचतात. एकदा मी त्यांच्या तोंडून पसायदान ऐकले आहे.

अश्या अनेकांनी स्वतः च्या धर्माची भिंत आड न येऊ देता हिंदू धर्माचा केलेला आदर माझ्यासाठी लाखमोलाचा आहे. हिंदुत्वाच्या नावाखाली राजकारण करणारे नेते दहीहंडी सारख्या हिंदू उत्सवाच्या कार्यक्रमाला शाहरुख खानला बोलवतात, तेंव्हा त्याच्या प्रसिध्दी, नावामुळे स्वतःचं उखळ पांढरं करून घेतात. ते चालतं त्यांना आणि त्यांच्या पक्षालाही.

रमजान ला मुस्लिमांच्या मांडीला मांडी लावून शिरखुरमा ओरपणारे आणि बिर्यानीवर उभा आडवा हात मारणारे नेते ,त्यांना कुणी का सवाल करत नाहीत? थोडक्यात काय तर धर्माचं राजकारण आपापल्या सोयीप्रमाणे करणारे महाभाग समाजात आहेत. असो

मी हिंदू आहेच पण माझ्या हिंदू धर्माबरोबरच इतर धर्माचाही मला आदर आहे आणि माझ्या धर्माचा आदर करणाऱ्या शाहरुख खान, आमिर खान, फय्याज, अश्या सगळ्यांचा मला अभिमान आहे”, असे महेश टिळेकरांनी या पोस्टमध्ये म्हटले आहे.

आणखी वाचा : “या कलाकारांना कोणती हिंदू संस्था…” मराठी दिग्दर्शकाचे शाहरुख आणि आमिर खानच्या ‘त्या’ कृतीला समर्थन

महेश टिळेकर यांनी ही पोस्ट फेसबुकवर शेअर केली आहे. त्यावर अनेकजण कमेंट करताना दिसत आहे.  तर काहींनी त्यांचे समर्थन केले आहे. सध्या त्यांची ही पोस्ट व्हायरल होत आहे.

मराठीतील सर्व मनोरंजन ( Manoranjan ) बातम्या वाचा. मराठी ताज्या बातम्या (Latest Marathi News) वाचण्यासाठी डाउनलोड करा लोकसत्ताचं Marathi News App.

First published on: 17-12-2022 at 19:45 IST

संबंधित बातम्या