‘मुलगी झाली हो’ या लोकप्रिय मालिकेतील मुख्य अभिनेत्याच्या भूमिकेत झळकणाऱ्या योगश सोहनीला काही दिवसांपूर्वी मुंबई- पुणे एक्सप्रेस वेवर लुटण्यात आलं होतं. एका कार चालकाने त्याला संमोहित करून ५० हजार रुपये काढून घेतले. त्यानंतर योगेशने तातडीने पोलिस ठाण्यात जाऊन तक्रार दाखल केली. योगेशच्या तक्रारीनंतर पोलिसांनी लगेचच सूत्र हलवली. आणि अवघ्या दोन दिवसात या आरोपीला गजाआड करण्यात आलंय.

अभिनेता योगेश सोहनीनेच एक व्हिडीओ शेअर करत याची माहिती दिली आहे. तसचं त्याने पोलिसांसह अनेकांचे आभार मानले आहेत. ८ मेला ही घटना घडली होती. मुंबई- पुणे एक्सप्रेस वेवर प्रवास करत असताना एका व्यक्तीने योगेशला अडवलं. त्याला दमदाटी केली आणि त्याच्याकडील ५० हजार रुपये काढून घेतले. संमोहनामुळे आपल्याला फार काही करता आलं नसल्याचं योगेश म्हणाला आहे. त्यानंतर पिंपरी-चिंचवड पोलिस ठाण्यात त्याने तक्रार दाखल केली. पिंपरी-चिंचवड क्राईम ब्रान्चच्या टीमने आरोपीचा शोध घेण्यास सुरूवात केली आणि दोन दिवसातच आरोपीला गडाआड करण्यात आलं. आरोपीची ओळख पटलेली आहे.

आरोपीला अटक केल्यानंतर योगेशने व्हिडीओ शेअर करत त्याला मदत करणाऱ्या सर्व पोलिसांची आभार मानले आहेत. या काळात त्याला अनेकांनी फोन करून विचारपूस केली. या सर्वांचे आभार मानत त्याने चाहत्यांबद्दलही आभार व्यक्त केले आहेत.

पुन्हा अशी घटना घडू नये म्हणून हा व्हिडीओ शेअर करत अशा घटनांपासून सावध राहण्यास सांगितलं आहे. ‘मुलगी झाली हो’ या मालिकेत योगेश शौनक ही मुख्य भूमिका साकारत आहे. या मालिकेला प्रेक्षकांटी मोठी पसंती मिळतेय.