काही दिवसांपूर्वी ‘बाबू’ या चित्रपटाच्या चित्रीकरणाला सुरुवात झाली होती. या चित्रपटातील एक ॲक्शन सीन चर्चेत होता. या सीनमध्ये अभिनेता अंकित मोहनची जबरदस्त ॲक्शन पाहायला मिळाली. त्यानंतर सोशल मीडियावर या चित्रपटात कोणती अभिनेत्री मुख्य भूमिकेत दिसणार अशा चर्चा रंगल्या होत्या. आता या चित्रपटात मूख्य भूमिकेत दिसणाऱ्या अभिनेत्रीचे नाव समोर आले आहे.
ॲक्शनचा धमाका असणाऱ्या ‘बाबू’ या चित्रपटात आता नेहा महाजनची एण्ट्री झाली आहे. मराठी, हिंदी चित्रपटांमधून घराघरात पोहोचलेली नेहा महाजन या चित्रपटात मुख्य भूमिकेत दिसणार आहे. सध्या तिचा या चित्रपटातील लूक सोशल मीडियावर व्हायरल होत असून यात तिने लाल रंगाची साडी नेसलेली दिसत आहे. त्यामुळे नेहाचा हा एकंदर पेहराव बघून या चित्रपटाविषयीची प्रेक्षकांमधील उत्सुकता आता अधिकच वाढली आहे.
आता चित्रपटात नेहाची भूमिका काय आहे? असा प्रश्न पडला आहे. प्रेक्षकांमा त्यांच्या या प्रश्नाचे लवकरच उत्तर मिळणार आहे. या चित्रपटाचे दिग्दर्शक मयूर मधुकर शिंदे हे असून निर्माता बाबू के. भोईर हे आहेत. श्री कृपा प्रोडक्शन निर्मित ‘बाबू’ या चित्रपटात अंकित मोहन, नेहा महाजनसोबत रुचिरा जाधवही दिसणार आहे.
