‘मिर्झापूर’च्या चाहत्यांसाठी आनंदाची बातमी आहे. पंकज त्रिपाठी, अली फजल आणि दिव्येंदू यांची महत्त्वपूर्ण भूमिका असलेला ‘मिर्झापूर : द मूव्ही’ आता ओटीटीवर प्रदर्शित झाला आहे. विशेष म्हणजे, चित्रपटगृहांमध्ये प्रदर्शित झालेल्या आवृत्तीपेक्षा ओटीटीवरील चित्रपटात काही अतिरिक्त दृश्यांचा समावेश करण्यात आला आहे. त्यामुळे प्रेक्षकांना हा चित्रपट एक्स्टेंडेड कटसह पाहता येणार आहे. ४ सप्टेंबर रोजी चित्रपटगृहांत प्रदर्शित झालेल्या या चित्रपटात मिर्झापूरच्या गादीसाठी पुन्हा एकदा संघर्ष पाहायला मिळतो. सीरिजमधील काही लोकप्रिय पात्र या चित्रपटाच्या निमित्ताने पुन्हा एकदा एकत्र आली आहेत.
गुरमीत सिंग यांनी या चित्रपटाचं दिग्दर्शन केलं आहे. यामध्ये पुन्हा एकदा कालीन भैया, गुड्डू पंडित आणि बबलू पंडित यांच्यातील वैर पाहायला मिळत आहे. जे प्रेक्षक हा चित्रपट चित्रपटगृहात पाहू शकले नाहीत, त्यांना आता घरबसल्या ओटीटीवर तो पाहता येणार आहे.
‘मिर्झापूर : द मूव्ही’ कुठे पाहता येणार?
‘मिर्झापूर : द मूव्ही’ हा चित्रपट प्राइम व्हिडीओवर ३० ऑक्टोबरपासून उपलब्ध झाला आहे. प्रेक्षकांना हा चित्रपट हिंदी भाषेत इंग्रजी सबटायटल्ससह पाहता येणार आहे. मात्र, चित्रपट पाहण्यासाठी प्राइम व्हिडीओचं अॅक्टिव्ह सबस्क्रिप्शन असणं आवश्यक आहे. विशेष म्हणजे, ओटीटीवर चित्रपटाचा एक्स्टेंडेड कट वर्जन प्रदर्शित करण्यात आला आहे. त्यामुळे चित्रपटगृहांमध्ये पाहायला मिळालेल्या आवृत्तीपेक्षा काही अतिरिक्त कंटेंट प्रेक्षकांना पाहता येणार आहे.
चित्रपटाच्या ओटीटीवरील प्रदर्शनाची घोषणा प्राइम व्हिडीओने इन्स्टाग्रामवर केली. यासाठी त्यांनी चित्रपटाचं पोस्टर शेअर करत, “भौकाल आ चुका है”, अशी कॅप्शन दिली आहे. तसेच #MirzapurTheMovieOnPrime हा हॅशटॅग वापरत चित्रपट पाहण्यासाठी उपलब्ध असल्याचं सांगितलं आहे.
‘मिर्झापूर : द मूव्ही’मध्ये कोणते कलाकार झळकले?
पंकज त्रिपाठी, अली फजल आणि दिव्येंदू यांच्याबरोबरच या चित्रपटात रवी किशन, अभिषेक बॅनर्जी, रसिका दुग्गल, जितेंद्र कुमार आणि मोहित मलिक हे कलाकार महत्त्वाच्या भूमिकांमध्ये दिसत आहेत. सीरिजमधील जुन्या पात्रांची पुन्हा एकदा झालेली एन्ट्री आणि मिर्झापूरच्या सत्तेसाठी सुरू असलेला संघर्ष हे या चित्रपटाचं प्रमुख आकर्षण आहे.
बॉक्स ऑफिसवरही चित्रपटाची दमदार कमाई
‘मिर्झापूर : द मूव्ही’ने बॉक्स ऑफिसवर दमदार सुरुवात केली होती. सॅक्निल्कच्या आकडेवारीनुसार, चित्रपटाने पहिल्या दिवशी ३०.९० कोटी रुपयांची कमाई केली. दुसऱ्या दिवशी ३८.४० कोटी, तर तिसऱ्या दिवशी ४३.०५ कोटी रुपयांचा गल्ला जमवला. पहिल्या आठवड्यात चित्रपटाचं एकूण कलेक्शन १४८.४५ कोटी रुपयांवर पोहोचलं. तर जगभरातील बॉक्स ऑफिस कमाईचा आकडा ३३९.८४ कोटी रुपये इतका आहे.
