टिक टिक बूम! तब्बल २९ वर्षांनी दोघे एकत्र दिसणार; दोघांनीही २ महिन्यांत दिले ब्लॉकबस्टर सिनेमे, ओळखलंत का?

‘इक्का’ हा एक कोर्टरूम ड्रामा आणि थ्रिलर चित्रपट आहे. चित्रपटात सनी देओल ‘सिकंदर मेहरा’ नावाच्या एका प्रामाणिक आणि तत्त्वनिष्ठ वकिलाची भूमिका साकारत आहे. पण कथा अशा वळणावर येते जिथे त्याला एका खुनाच्या आरोपीचा बचाव करावा लागतो, असा माणूस ज्याचं करिअर यापूर्वी त्यानेच बरबाद केलेलं असतं. हा आरोपी अक्षय खन्ना असून, दोघांमधील जुने शत्रूत्व आणि नैतिक संघर्ष या चित्रपटात पाहायला मिळतात.

इक्का सिनेमातील कलाकार

‘इक्का’बद्दल बोलायचं झाल्यास यात कलाकारांची मांदियाळी आहे. सनी देओल आणि अक्षय खन्ना यांच्यासह दिया मिर्झा, तिलोत्तमा शोम, संजीदा शेख आणि आकांक्षा रंजन कपूर या सिनेमात महत्त्वाच्या भूमिकेत आहेत. या चित्रपटाचे दिग्दर्शन सिद्धार्थ पी. मल्होत्रा यांनी केलं आहे.

‘इक्का’ हा चित्रपट नेटफ्लिक्स (Netflix) या ओटीटी प्लॅटफॉर्मवर प्रदर्शित होणार आहे. अद्याप या सिनेमाच्या रिलीजची तारीख निश्चित झालेली नाही, परंतु २०२६ मध्ये तो प्रेक्षकांच्या भेटीला येईल.

सनी देओल व अक्षय खन्ना २९ वर्षांनी एकत्र दिसणार

सनी देओल आणि अक्षय खन्ना तब्बल २९ वर्षांनंतर पुन्हा एकदा पडद्यावर एकत्र येत आहेत. याआधी त्यांनी १९९७ मधील जे.पी. दत्ता यांच्या ‘बॉर्डर’ (Border) या ब्लॉकबस्टर चित्रपटात एकत्र काम केलं होतं. ‘बॉर्डर’मध्ये त्यांनी युद्ध लढणाऱ्या सैनिकांच्या भूमिका केल्या होत्या, तर ‘इक्का’मध्ये ते एकमेकांविरुद्ध उभे ठाकलेले पाहायला मिळतील.

चित्रपटाच्या नुकत्याच प्रदर्शित झालेल्या टीझरमध्ये सनी देओलचा ‘दामिनी’मधील वकिलाचा अवतार आणि अक्षय खन्नाचा ‘धुरंधर’मधील ‘रेहमान डकैत’ स्टाईल लूक प्रेक्षकांची उत्सुकता वाढवणारा ठरत आहे.