बॉलिवूड अभिनेता सलमान खान सध्या सतत चर्चेत असतो. नुकताच सलमान 'किसी का भाई किसी की जान' या चित्रपटात दिसला. अलीकडेच अशी बातमी समोर आली आहे की, बॉक्स ऑफिसवर धुमाकूळ घातल्यानंतर आता भाईजान ओटीटीवर आपली दबंग स्टाईल दाखवण्यास सज्ज आहे. ही बातमी समोर आल्यामुळे सलमानचे चाहते खूपच उत्सुक झाले आहेत. काही मीडिया रीपोर्टनुसार सलमान लवकरच ओटीटीवर पदार्पण करणार आहे. एका प्रसिद्ध मीडिया हाऊसच्या रिपोर्टनुसार, सलमानला या ओटीटीसाठी एका वेब सीरिजची संकल्पना चांगलीच आवडली आहे आणि शिवाय ही वेब सीरिज अॅक्शनने भरलेली असणार आहे असं सांगितलं जात आहे. अद्याप या गोष्टींवर चर्चा सुरू असून कोणतीही अधिकृत घोषणा झालेली नाही. आणखी वाचा : IIFA 2023 मध्ये 'गंगूबाई काठियावाडी' व 'विक्रम वेधा'चा डंका; रितेश देशमुखच्या 'वेड'लाही मिळाला खास पुरस्कार काही मीडिया रिपोर्ट्समध्ये असे सांगण्यात आले आहे की, "सलमान या प्रोजेक्टबद्दल खूप उत्सुक आहे आणि लवकरच तो या प्रोजेक्टवर विचार करून काम सुरू करणार आहे." सलमान खानकडे आदित्य चोप्राचा आणखी एक चित्रपट आहे, ज्यामध्ये शाहरुख खान आणि सलमान खान एकत्र दिसणार आहेत. सलमानचे चित्रपट हे कौटुंबिक मनोरंजन करतात, त्यामुळे ओटीटीवर जरी तो कोणत्या वेब सीरिजमध्ये दिसला तरी त्यात बोल्ड कंटेंट फारसा आढळणार नाही. शिवाय नुकतंच सलमानने फिल्मफेअरदरम्यान पत्रकारांशी संवाद साधताना ओटीटीवरील सेन्सॉरशीपवर भाष्य केलं होतं. याबरोबरच आता सलमान 'बिग बॉस ओटीटी सीझन २'चंही सूत्रसंचालन करणार आहे. सैफ अली खान आणि शाहिद कपूरनंतर सलमान खान हा ओटीटीवर झळकणारा तिसरा बॉलिवूड स्टार ठरतोय की नाही ते येणारी वेळच सांगेल.
