Tunisha Sharma Committed Suicide: छोट्या पडद्यावरील अभिनेत्री तुनिषा शर्माने शनिवारी (२४ डिसेंबर) दुपारी मालिकेच्या सेटवरच गळफास घेत आत्महत्या केली. यानंतर एकच खळबळ उडाली. ती सोनी सब टीव्हीवरील ‘अलिबाबा: दास्तान ए काबुल’ या मालिकेत मुख्य भूमिका साकारत होती. तिच्या आत्महत्येविषयी अनेक तर्कवितर्क लावले जात आहेत. आता पोलिसांनी यावर प्रतिक्रिया दिली आहे. सहाय्यक पोलीस आयुक्त चंद्रकांत जाधव म्हणाले, "तुनिषा शर्मा अलिबाबा मालिकेतील अभिनेत्री आहे. तिने शुटिंग सुरू असतानाच स्टुडिओमध्ये गळफास लावून आत्महत्या केली. पोलिसांनी तुनिषाच्या आईच्या तक्रारीवरून गुन्हा दाखल केला आहे. आत्महत्येसाठी प्रवृत्त केल्याप्रकरणी तिचा सहकलाकार शीजान खानला अटक करण्यात आली आहे. शीजानचे तुनिषाबरोबर प्रेमसंबंध होते. या प्रेमाच्या नैराश्येतूनच तुनिषाने ही आत्महत्या केली असं तिच्या आईचं म्हणणं आहे." "तुनिषाच्या आईच्या तक्रारीवरून गुन्हा दाखल" "याप्रमाणे पोलिसांनी तुनिषाच्या आईच्या तक्रारीवरून गुन्हा दाखल करण्यात आला आहे. आरोपीवर भारतीय दंड विधान कलम ३०६ अंतर्गत गुन्हा दाखल केला आहे. त्याला उद्या न्यायालयापुढे हजर केले जाईल," अशी माहिती पोलिसांनी दिली. हेही वाचा : प्रसिद्ध टीव्ही अभिनेत्री तुनिषा शर्माची आत्महत्या! वसईमध्ये मालिकेच्या सेटवरच घेतला गळफास दरम्यान, तुनिषा शर्माच्या आत्महत्येनंतर प्रसिद्ध दिग्दर्शक आनंद कुमार यांनी ट्वीट केलं. “सामान्य घरातील प्रसिद्धी मिळविलेल्या प्रतिभावान, कष्ट करण्याची तयारी असलेल्या व्यक्ती आत्महत्या का करतात? त्यांच्या आई-वडिलांना कोणत्या परिस्थितीतून जावं लागेल हा विचार ते करत नाहीत का? तुनिषा शर्माची बातमी ऐकल्यानंतर मी सुन्न झालो आहे.”
