Allu Arjun Hospital Video : तेलुगू सुपरस्टार अल्लू अर्जुनला आज त्याच्या हैदराबाद येथील घरातून पोलिसांनी अटक केली. ‘पुष्पा 2’ या चित्रपटाच्या प्रिमियरमध्ये चेंगराचेंगरी झाली होती. या घटनेत एका ३९ वर्षीय महिलेचा मृत्यू झाला होता. या प्रकरणी पोलिसांनी आज अभिनेत्याला अटक केली. अटक केल्यावर पोलिसांनी त्याला रुग्णालयात नेलं, त्याचा रुग्णालयातील व्हिडीओ समोर आला आहे.
अल्लू अर्जुनला पोलिसांनी अटक करून वैद्यकीय तपासणीसाठी हॉस्पिटलमध्ये नेलं तेव्हाचा व्हिडीओ सोशल मीडियावर व्हायरल झाला आहे. या व्हिडीओत अल्लू अर्जुन हात जोडताना दिसतोय. अभिनेत्याला आत नेल्यावर तिथे डॉक्टर उभे असलेले दिसत आहेत.
हेही वाचा – अल्लू अर्जुनने पत्नीला किस केलं अन् हसत हसत पोलिसांच्या गाडीत जाऊन बसला; अभिनेत्याचा अटकेआधीचा Video Viral
अल्लू अर्जुनच्या अटकेनंतर अनेक चाहते त्याच्या समर्थनार्थ पोस्ट करत आहेत. त्याला रुग्णालयात नेलं तेव्हा तिथेही चाहत्यांची मोठी गर्दी जमली होती. अभिनेत्याला आज कोर्टात हजर करण्यात येणार आहे. कोर्ट या प्रकरणात काय निर्णय देणार, याकडे लक्ष लागले आहे.
नेमकं प्रकरण काय?
४ डिसेंबरला ‘पुष्पा २’ चित्रपटाचा प्रिमियर इव्हेंट होता. याठिकाणी झालेल्या चेंगराचेंगरीच्या दुर्घटनेमध्ये एका ३९ वर्षीय महिलेचा मृत्यू झाला होता. या महिलेचा मुलगा रुग्णालयात असून त्याची प्रकृती गंभीर आहे. याप्रकरणी पोलिसांनी अभिनेता अल्लू अर्जुन, संध्या थिएटर व्यवस्थापन आणि अल्लू अर्जुनच्या सुरक्षा पथकाविरोधात गुन्हा दाखल केला होता. पोलिसांनी अल्लू अर्जुनला शुक्रवारी दुपारी अटक करून चिक्कडपल्ली पोलीस स्थानकात नेलं. महिलेच्या मृत्यूची नोंद याच पोलीस स्टेशनमध्ये करण्यात आली आहे.
