बॉलिवूडमधील असे अनेक कलाकार आहेत ज्यांनी बॉलिवूडमध्ये काही वर्ष काम केल्यानंतर चित्रपटसृष्टीतून काढता पाय घेतला. परंतु सध्या हेच कलाकार अनेक वर्षानंतर पुन्हा एकदा बॉलिवूडमध्ये पुनरागमन करताना दिसत आहेत. यातच आता तब्बल २८ वर्षानंतर कपूर कुटुंबातील नावाजलेला एक अभिनेता चित्रपटात झळकण्यास सज्ज झाला आहे.

‘फर्स्ट पोस्ट’नुसार, दिग्दर्शक आशुतोष गोवारीकर यांच्या बॅनरअंतर्गत तयार होणाऱ्या चित्रपटाच्या माध्यमातून ज्येष्ठ अभिनेते राजीव कपूर पुन्हा एकदा चित्रपटसृष्टीत पदार्पण करणार आहेत. या चित्रपटामध्ये राजीव कपूर मुख्य भूमिकेत झळकणार आहे. मात्र अद्याप या चित्रपटाच्या नावाचा खुलासा झालेला नाही. गेल्या २८ वर्षापासून राजीव कपूर यांनी चंदेरी दुनियेपासून फारकत घेतली होती.

राजीव कपूर यांची चित्रपट सृष्टीतील कारकीर्द तसं पाहायला गेलं तर फार कमी आहे. मात्र त्यांचा काही चित्रपट आजही प्रेक्षकांच्या स्मरणात आहेत. त्यातील ‘राम तेरी गंगा मैली’ हा चित्रपट अजूनही प्रेक्षकांच्या मनावर अधिराज्य गाजवत आहे.

दरम्यान, १९९० मध्ये आलेला ‘जिम्मेदार’हा चित्रपट राजीव कपूर यांचा अखेरचा चित्रपट होता. या चित्रपटानंतर राजीव यांनी अभिनयाला रामराम केला. मात्र त्यानंतर त्यांनी भाऊ रणधीर कपूर यांच्यासोबत हिना या चित्रपटाची निर्मिती केली होती.