छोट्या पडद्यावरील लोकप्रिय अभिनेत्री संभावना सेठ सध्या कठीण काळातून जात आहे. काही दिवसांपूर्वी तिच्या वडिलांचे करोनामुळे निधन झाले. आता वडिलांच्या निधनाच्या तिन महिन्यांतर संभावनाची आई आजरी असल्याचे तिने सोशल मीडिया पोस्टद्वारे सांगितले आहे. संभावनाने तिच्या इन्स्टाग्राम अकाऊंटवर आईसोबतचा एक व्हिडीओ शेअर केला आहे. या व्हिडीओमध्ये तिची आई अंथरुणात असल्याचे दिसत आहे. 'मित्रांनो मी तुमच्यासोबत हा व्हिडीओ शेअर करत आहे. मी माझ्या आयुष्यातील सर्वात कठीण काळातून जात आहे. पहिले मी माझ्या वडिलांना गमावले आणि आता माझ्या आईला या आवस्थेत पाहून मी आतून तुटले आहे' या आशयाचे तिने कॅप्शन दिले आहे. View this post on Instagram A post shared by Sambhavna Seth (@sambhavnasethofficial) संभावनाच्या या पोस्टवर इंडस्ट्रीमधील अनेक कलाकारांनी कमेंट केल्या आहेत. दिग्दर्शक महेश पाडेने 'देवाचा आशिर्वाद आहे, विश्वास ठेव' असे म्हटले आहे. रश्मी देसाई, भारती सिंह, पंखुडी अवस्थी, डेलनाज ईराणी आणि इतर काही कलाकारांनी संभावनाच्या आईसाठी प्रार्थना केली आहे. यापूर्वी संभावनाने वडिलांच्या मृत्यूला हॉस्पिटल जबाबदार असल्याचे म्हटले होते. “त्यांनी माझ्या वडिलांना मारले. ज्या प्रकारे लोक बोलतात की हे जग ब्लॅक अॅंड व्हाईट नसतं. त्याचप्रमाणे, प्रत्येक डॉक्टर ईश्वर समान असू शकत नाही. असेही काही वाईट लोक आहेत ज्यांनी पांढरा कोट घातला आहे आणि त्यांनी आपल्या प्रियजनांचा जीव घेतला आहे,” असे संभावना सोशल मीडियावर व्हिडीओ शेअर करत म्हणाली होती.