छोट्या पडद्यावरील अतिशय लोकप्रिय रिअॅलीटी शो बिग बॉस मराठी सिझन २मधून महाराष्ट्राच्या घराघरात पोहोचलेली अभिनेत्री म्हणजे शिवानी सुर्वे. आता शिवानी एक वेगळ्या भूमिकेत दिसणार आहे. ती निर्माता दिपक राणे यांच्या चित्रपटात काम करताना दिसणार आहे. या चित्रपटात शिवानीसोबत अजून कोणकोणते कलाकार असतील ही माहिती सध्या गुलदस्त्यात आहे. गेल्या दहा वर्षातल्या यशस्वी टिव्ही कारकिर्दीनंतर ‘बिग बॉस मराठी’ हा रिअॅलिटी शो तिने केला. २०१६मध्ये शिवानी ‘घंटा’ सिनेमात झळकली. त्यानंतर २०१९ मध्ये अभिनेता अंकुश चौधरीसोबतच्या ‘ट्रिपल सीट’ सिनेमात ती दिसली. शिवाय २०२० मध्ये सिटी सिने अवॉडर्समध्ये शिवानीला ‘ट्रिपल सीट’ सिनेमासाठी ‘सर्वोत्कृष्ट डेब्यू अभिनेत्री’ पुरस्काराने गौरवण्यात आले. तसेच तिचा चाहता वर्ग ही अफाट आहे. अभिनेत्री शिवानी सुर्वे तिच्या नव्या प्रोजेक्टविषयी बोलताना म्हणाली, “मी या सिनेमासाठी फारच उत्सुक आहे. जेव्हा मी पहिल्यांदा ही कथा ऐकली. त्यानंतर मी क्षणाचाही विलंब न करता त्वरीत होकार कळवला. खरंतर या सिनेमातील माझी भूमिका खूपच चॅलेंजींग आहे. आणि मी पहिल्यांदाच माझ्या कम्फर्ट झोनच्या बाहेर जाऊन काहीतरी चॅलेंजींग करणार आहे. सध्या मी सिनेमातील भूमिकेची तयारी करत आहे. तर या सिनेमाच शुटींग लवकरच सुरू होईल.”