“मी नास्तिक घरात वाढले, आमच्या घरात देव नव्हते”; सुपरस्टारची लेक म्हणाली, “माझ्या आईला भीती वाटायची की…”

श्रुती हासन ही तमिळ सुपरस्टार कमल हासन यांची कन्या आहे. श्रुती मूर्तिपूजेवर विश्वास ठेवते. ‘सालार: पार्ट १ – सीझफायर’ (२०२३), ‘गब्बर सिंग’ (२०१२), ‘रेस गुर्रम’ (२०१४), ‘श्रीमंथुडू’ (२०१५) यांसारखे अनेक लोकप्रिय तेलुगू, तमिळ आणि हिंदी चित्रपट श्रुतीने केले आहेत.

आईने आधी हिंदी शिकवली – श्रुती हासन

श्रुती हासन तामिळनाडूमध्ये वडील कमल हासन, आई सारिका ठाकूर आणि धाकटी बहीण अक्षरा हासन यांच्याबरोबर राहिली. रणवीर अलाहाबादियाच्या एका पॉडकास्टमध्ये श्रुतीने तामिळ आणि हिंदी भाषेशी असलेल्या संबंधांबद्दल आणि आई-वडिलांचा वारसा पुढे नेण्याच्या दबावाबद्दल भाष्य केलं होतं. “मी तमिळनाडूत वाढले, पण माझ्यावर माझ्या आईचाही खूप प्रभाव आहे. बऱ्याच लोकांना माहीत नाही पण आम्ही घरी फक्त हिंदी आणि इंग्रजीमध्ये बोलायचो. कारण माझ्या आईला भीती वाटायची की आम्ही दोघी बहिणी कधीच हिंदी शिकणार नाही आणि तमिळच बोलतील. यामुळे आम्हाला बरीच वर्षे चांगली तमिळ बोलता येत नव्हती,” असं श्रुती हासन म्हणाली.

मुंबईबद्दल श्रुती हासन म्हणाली…

“मी इंग्रजी शाळेत शिकले, त्यामुळे माझं तमिळ भाषेवर प्रभुत्व नव्हतं, किंबहुना आताही नाही. मी जगभर फिरलेय आणि गेल्या १५ वर्षांपासून मुंबईत राहत असल्यामुळे, या शहराशी माझं एक भावनिक आणि ऐतिहासिक नातं जोडलं गेलंय. माझ्या पालकांचा घटस्फोट झाल्यावरही मी इथेच राहायला आले होते,” असं श्रुती हासनने सांगितलं. श्रुती २०१० मध्ये मुंबईत शिफ्ट झाली. २००९ मध्ये ‘लक’ या अॅक्शन थ्रिलर चित्रपटातून तिने बॉलीवूडमध्ये पदार्पण केलं होतं.

आम्ही नास्तिक घरात वाढलो – श्रुती हासन

श्रुती हासनने अनेक मुलाखतींमध्ये तिच्या घरातील नास्तिक पण आध्यात्मिक कुटुंबाबद्दल सांगितलं आहे. “आम्ही एका नास्तिक घरात वाढलो. मी धर्माबद्दल बोललेलं माझ्या वडिलांना अजिबात आवडत नाही. आमच्या घरी देव नव्हते, किंवा मंगळवारी मांसाहार करायचा नाही, अशा इतर घरांमध्ये असलेल्या कोणत्याही गोष्टी आमच्याकडे नव्हत्या. धर्म आणि देव या गोष्टींपासून आम्ही पूर्णपणे अनभिज्ञ होतो. बालपणी मला कला हीच देव आहे, इतकंच माहीत होतं,” असं श्रुती हासन म्हणाली.

बंडखोर श्रुती

श्रुतीचे वडील कमल हासन स्वतःला बुद्धीजीवी मानतात. पण श्रुती बंडखोर होती, त्यामुळे त्यांनी तिच्या काही श्रद्धांना विरोध केला नाही. “जर तुम्ही माझ्या वडिलांकडे जाऊन ज्योतिषशास्त्राबद्दल बोललात, तर ते म्हणतील ‘निघा इथून’. ते खूप सर्जनशील आणि व्यावहारिक आहेत. दैनंदिन आयुष्यात वास्तववादी आहेत. त्यांनी मला चेटकिणीसारखे लेन्स लावून आणि गुलाबी केसांमध्ये पाहिलंय. बिचारे माझे वडील. त्यांनी माझी बंडखोरी खरंच पाहिली आहे आणि त्यांनी मला ते करू दिलं, हा त्यांचा मोठेपणा आहे. आणि त्यांना टॅटू आवडत नाहीत, त्यांना टॅटूचा तिरस्कार आहे,” असं श्रुती हासन म्हणाली.