ताप आला अन् रुग्णालयात गेला, भारतीय गायकाचं दुबईत कॉन्सर्टआधी निधन; मृत्यूचं धक्कादायक कारण आलं समोर

निसार वायनाडचं मूळ नाव निसार अरोथ इब्राहिम आहे. त्याच्या पश्चात पत्नी आणि दोन मुली असा परिवार आहे. निसार वायनाडने शनिवारी दुपारी सांगितलं की त्याला खूप ताप आलाय. त्यानंतर त्याला रुग्णालयात दाखल करण्यात आलं होतं. अहवालानुसार, निसारचं निधन ‘ॲसिडोसिस’मुळे (Acidosis) झालं, असं सांगण्यात आलंय. मृत्यूआधी त्याचं शेवटचं बोलणं मित्र नौजास कयाक्कूलशी झालं होतं.

निसार वायनाडच्या मित्राने दिली माहिती

“काल सकाळी तो माझ्याबरोबरच होता. त्याला दोन दिवसांपासून ताप येत होता, पण पॅरासिटामॉल घेतल्यावर ताप कमी होईल असं त्याला वाटत होतं. दुपारी त्याचा फोन आला आणि रुग्णालयात जात असल्याचं त्याने सांगितलं. रुग्णालयातून गेल्यावर त्याची प्रकृती गंभीर असल्याचं मला समजलं. त्याच्या उपचारासंदर्भात मी सतत डॉक्टरांच्या संपर्कात होतो. पण दुर्दैवाने डॉक्टर त्याला वाचवू शकले नाहीत,” असं नौजास कयाक्कूल यांनी सांगितलं.

“वडिलांच्या निधनानंतर अगदी लहान वयातच त्यांनी संपूर्ण कुटुंबाची जबाबदारी निसारने स्वतःवर घेतली होती. आणि आता त्याचंही कमी वयात निधन झालं. तो उत्तम गायक तर होताच पण माझा खूप जवळचा मित्रही होता. त्याच्या जाण्याने माझ्या आयुष्यात कधीच न भरून निघणारी पोकळी तयार झाली आहे,” असं नौजास यांनी गल्फ न्यूजला सांगितलं.

निसार वायनाडच्या मृत्यूचे कारण

निसारच्या मेडिकल रिपोर्टनुसार त्याचे निधन ॲसिडोसिस व सेप्टिसेमिया आहे. म्हणजेच निसारला इन्फेक्शन झालं होतं, त्यामुळे त्याचे अवयव निकामी झाले आणि शरीरातील रक्त व इतर द्रव यातील ॲसिड प्रमाणाबाहेर वाढले. निसारला मधुमेह होता. पण त्याच्या मित्राला याबद्दल माहिती नव्हती. निसारचे दुबईत निधन झाले, तिथून त्याचे पार्थीव केरळमधील वायनाड या मूळ गावी आणण्यात आले. तिथेच त्याच्यावर अंत्यसंस्कार करण्यात आले.