दिवसेंदिवस देशात करोना व्हायरसचा फैलाव वाढत चालला असल्याचे दिसत आहे. सामान्यांपासून ते दिग्गजांपर्यंत अनेकांना करोनाचा संसर्ग झाल्याचे दिसत आहे. अनेक मालिकांच्या सेटवर कलाकार आणि क्रू मेंबर्सची करोना चाचणी पॉझिटीव्ह आल्यामुळे चित्रीकरण थांबवण्यात आले आहे. आता बॉलिवूड अभिनेत्री तमन्ना भाटीयाच्या आई-वडिलांना करोनाचा संसर्ग झाल्याचे समोर आले आहे.

बॉलिवूड अभिनेत्री तमन्ना भाटीयाने ट्विट करत तिच्या आई-वडिलांची करोना चाचणी पॉझिटीव्ह आल्याचे सांगितले आहे. तिने पोस्टमध्ये तिच्या आई-वडिलांमध्ये करोनाची सौम्य लक्षणे जाणवू लागल्यामुळे करोना चाचणी केली आणि ती पॉझिटीव्ह आल्याचे सांगितले आहे.

‘माझ्या आई-वडिलांमध्ये करोनाची सौम्य लक्षणे जाणवत होती. म्हणून आम्ही सर्वांनी तातडीने करोना चाचणी केली आणि आज रिपोर्ट आले. त्यात माझ्या आई-वडिलांची करोना चाचणी पॉझिटीव्ह आली. माझी आणि घरातील इतर लोकांची चाचणी निगेटीव्ह आली. आम्ही सध्या योग्य ती काळजी घेत आहोत’ असे तमन्नाने ट्विट केलेल्या पोस्टमध्ये म्हटले आहे.