“इंडस्ट्रीतला मुलगा नकोच होता…”, ‘अशी’ आहे अपूर्वा नेमळेकर-तनुज गोवळकर यांच्या लग्नाची गोष्ट, म्हणाली, “९ वर्षात मी…”

‘रात्रीस खेळ चाले’, ‘आभास हा’, ‘प्रेमाची गोष्ट’ अशा लोकप्रिय मालिकांमधून अपूर्वाने प्रेक्षकांचे मनोरंजन केले आहे. तसेच ती ‘बिग बॉस मराठी’ या शोमध्येसुद्धा सहभागी झाली होती. कामामुळे चर्चेत असणारी ही अभिनेत्री तिच्या वैयक्तिक आयुष्यामुळेही अनेकदा चर्चेत राहिली आहे. अशातच तिने दोन महिन्यांपूर्वी दुसऱ्यांदा लग्नगाठ बांधली.

नुकत्याच एका मुलाखतीत अपूर्वाने तिच्या लग्नाची गोष्ट सांगितली आहे. राजश्री मराठीला दिलेल्या मुलाखतीत अपूर्वा म्हणाली, “मला माझ्या क्षेत्रातला मुलगा नको होता. गेले १५ वर्षे खूप काम केल्याने आता आयुष्यात शांतता असावी अशी माझी अपेक्षा आहे, म्हणूनच या इंडस्ट्रीतला कुणी नको हवा होता. मला वधू-वर सूचक संकेतस्थळाशिवाय काही पर्याय नव्हता. त्यावर मी रीतसर नाव नोंदवलं, त्यावरून मी अनेकांना भेटलेदेखील. त्यांना भेटल्यानंतर मला जाणवायचं की, लग्न करणे खरंच गरजेचे आहे का? मी अक्षरश: कंटाळले होते. त्यानंतर मी ठरवलं की, माझ्या आयुष्यात ज्याला यायचं आहे तो येईल.”

“कंटाळून मी नंतर वधू-वर सूचक संकेतस्थळ अक्षरश: गेम खेळल्यासारखं पहायला लागले. तेव्हा माझी भाची अधिकाने एकेदिवशी मला विचारलं की, ‘तू काय करतेयस?’ तर मी तिला म्हटलं की, ‘हा एक गेम आहे, इथे नवरा मिळतो.’ त्यावर ती म्हणाली, ‘मी शोधते तुझ्यासाठी नवरा.’ तेव्हा एक मुलगा डॉक्टर होता, त्याला बघून अधिका म्हणाली, ‘हा डॉक्टर आहे, नको नको… हा तुला वेळ नाही देऊ शकणार. हा पेशंटकडे लक्ष देईल की, तुला वेळ देईल. हा नको…’ नंतर मग एक मुलगा होता. त्याचा वधू-वर सूचक संकेतस्थळावर गिटार वाजवतानाचा फोटो होता. तो फोटो बघून ती म्हणाली, ‘हा नको… हा बाजापेटी वाजवत बसेल; तर तू वैतागून जाशील.’ ती जे काही बोलत होती, त्याला मी मस्करीतच घेत होते. त्यानंतर तिसरा फोटो होता तो तनुजचा होता. त्यात त्याने ब्लेझर घातलेला फोटो होता. ते बघून अधिका म्हणाली, ‘हा मुलगा खूप छान वाटतोय.’ तिने तेव्हा लगेच तनुजला रिक्वेस्ट पाठवली होती. मग मी तनुजचे फोटो वगैरे पाहिले. पुढे तनुजकडूनही रिप्लाय आला आणि आम्ही बोलायला लागलो. अधिका पुढच्या दिवशी पुण्याला गेली. त्याच्याच पुढच्या दिवशी आम्ही भेटलो. त्यामुळे आमच्या एकत्र येण्यामागे माझी भाची महत्त्वाची व्यक्ती आहे,” असं अपूर्वा म्हणाली.

यानंतर अपूर्वा सांगते, “माझा लग्नसंस्थेवर विश्वास आहे. माझ्या आई-बाबांनी ३६ वर्षांचा संसार केलाय, त्यात ते कधीच भांडले नाहीत. एखाद्या व्यक्तीमुळे लग्न टिकलं नाही; तर लग्न वाईट आहे असं म्हणणं चुकीचं आहे. त्यामुळे मला आयुष्याला आणखी एक संधी द्यायची होती. यात मला घाई करायची नव्हती. ९ वर्षात मी अनेक मुलांना भेटले. घरच्यांनी आणि नातेवाईकांनी सुचवलेले, वधू-वर सूचक संकेतस्थळांवरून सुचवलेल्या अशा अनेक मुलांशी मी बोलले. यात मला माझ्या अपेक्षेप्रमाणे कुणीच मिळत नव्हता. त्यामुळे खूप वेळ जात होता; पण तरी मी सकारात्मक होते. तीच वाट बघितल्याने तनुज माझ्या आयुष्यात आला असं मी म्हणेन.”

View this post on Instagram

A post shared by Apurva Nemlekar Govalkar (@apurvanemlekarofficial)

शेवटी अपूर्वा म्हणाली, “तनुजबरोबरच्या पहिल्या भेटीतच मी त्याच्याशी माझ्या आयुष्यभराचं बोलून घेतलं. तो खूप शांत आहे. इतकी शांतता मी कधीच अनुभवली नव्हती. त्याच्याशी बोलून मला त्याच्या क्षेत्राविषयी कळलं आणि एकूणच ते सगळं खूप आवडू लागलं. तनुजसारखा नवरा हवा आहे अशी मी इच्छा व्यक्त केली होती आणि माझ्या इच्छेनुसारच मला नवरा मिळाला.”