Aishwarya Narkar On Zee Marathi Awards : ‘झी मराठी’ वाहिनीला यंदा २५ वर्षे पूर्ण झाली. दरवर्षी या वाहिनीवर सुरू असलेल्या मालिकेतील कलाकारांचा सन्मान करण्यासाठी ‘झी मराठी पुरस्कार’ सोहळ्याचं आयोजन केलं जातं. यंदा वाहिनीला २५ वर्षे पूर्ण झाल्याने सोहळ्याचं स्वरुप काहीसं भव्य होतं. सर्वोत्कृष्ट नायिका, नायक, लोकप्रिय मालिका असे अनेक पुरस्कार यावेळी देण्यात आले. यासाठी प्रेक्षकांनी देखील व्होट्स केले होते.
गेली दोन वर्षे सर्वोत्कृष्ट खलनायिकेच्या पुरस्कारावर ‘तुला शिकवीन चांगलाच धडा’ मालिकेतील भुवनेश्वरीने नाव कोरलं आहे. या कॅटेगरीत ‘सातव्या मुलीची सातवी मुलगी’ मालिकेत खलनायिकेची भूमिका साकारणाऱ्या ऐश्वर्या नारकरांना देखील नामांकन मिळालं होतं. मात्र, दोन्ही वर्ष त्यांना पुरस्कार जिंकता आला नाही. याबद्दल त्यांच्या चाहत्यांनी कमेंट्स करत नाराजी व्यक्त केली होती. याशिवाय त्यांना इन्स्टाग्राम ‘आस्क मी सेशन’मध्ये सुद्धा प्रश्न विचारले होते. आता अभिनेत्रीने ( Aishwarya Narkar ) युट्यूब व्हिडीओ शेअर करत याबाबत स्पष्टीकरण दिलं आहे.
“हिरमुसल्यासारखं झालं कारण…”, ऐश्वर्या नारकर काय म्हणाल्या?
ऐश्वर्या ( Aishwarya Narkar ) म्हणाल्या, “अलीकडेच झी मराठी पुरस्कार सोहळा पार पडला. यावर माझी ‘सातव्या मुलीची सातवी मुलगी’ ही मालिका सुरू आहे. तुम्ही सगळे बघतच असाल…यामध्ये मी नकारात्मक भूमिका साकारत आहे. आधी रुपाली, विरोचक, शतग्रीव या भूमिका मी साकारल्या आहेत. आता सध्या मी साकारतेय त्या भूमिकेच नावं मैथिली आहे ही काहीसं सकारात्मक आहे. मला खलनायिकेसाठी नामांकन मिळालं होतं पण, पुरस्कार मिळाला नाही, गेल्यावर्षी सुद्धा पुरस्कार मिळाला नव्हता. अर्थात यामुळे मला काहीसं हिरमुसल्यासारखं झालं. कारण, मला पुरस्कार खूप आवडतात. मला वाटतं ती आपल्या कामाची पोचपावती असते. आपल्याला लोकाश्रय मिळतो…आणि लोकांना आपलं काम आवडतंय हे पाहून जास्त छान वाटतं. या लोकाश्रयाबरोबर राजाश्रय मिळणं ही फार चांगली गोष्ट असते त्यामुळे मला अवॉर्ड्स खूप आवडतात. पण, दोन्ही वर्षी मला पुरस्कार मिळाला नाही. झी मराठीचं यंदाचं २५ वं वर्ष होतं त्यामुळे एकंदर हा सोहळा खूपच दिमाखदार झाला.”
ऐश्वर्या ( Aishwarya Narkar ) पुढे म्हणाल्या, “पुरस्कार मिळणं, न मिळणं हे आपल्या हातात नसतं. आपण आपलं काम १०० टक्के करणं हे नक्कीच आपण करू शकतो. आपल्या कामाची पोचपावती नेहमीच आपल्याला लोकांकडून मिळत असते. मी समाधानी आहे कारण, मी जी भूमिका साकारतेय…ते काम लोकांना खूप आवडतंय. ते मला नेहमी सांगतात आम्हाला रुपालीचा ( मालिकेतील भूमिका ) राग येतो. हे कौतुक माझ्यासाठी खूप आहे. इथून पुढेही आपण असंच काम करत राहुयात असं वाटतं आणि मी सुद्धा प्रमाणिकपणे माझं काम करत राहीन” असं ऐश्वर्या नारकरांनी सांगितलं.
