Video : माहेरहून पाठवणी, सासरी BMW गाडीतून एन्ट्री! अनुष्काचं पुण्यात जंगी स्वागत, पती निखिलसह आलिशान फ्लॅटमध्ये गृहप्रवेश

लग्न थाटामाटात पार पडल्यावर सरकटे कुटुंबीयांनी अनुष्काची माहेरहून भावुक होत पाठवणी केली. अभिनेत्रीचं कुटुंब खूप मोठं आहे. उखाणा घेताना अनुष्काने आमचं २२ जणांचं कुटुंब असल्याचं सांगितलं होतं. त्यामुळे बालपणापासूनच तिला कुटुंबीयांचं खूप प्रेम मिळालं आहे. ‘माझे बाबा ज्या मुलावर हात ठेवणार त्याच्याशीच मी लग्न करणार’ हे अनुष्काचं पहिल्यापासून ठरलं होतं. निखिलने सरकटे कुटुंबीयांची मनं जिंकून घेतली आणि आता तो त्यांचा लाडका जावई झाला आहे. अनुष्काचे माहेरचे तिची सासरी पाठवणी करताना भावुक झाले होते.

यानंतर अनुष्का-निखिल पुण्यात पोहोचले. अभिनेत्रीने सासरी आलिशान BMW गाडीतून एन्ट्री घेतली. नव्या सुनेच्या स्वागतासाठी संपूर्ण चव्हाण कुटुंब एकत्र जमलं होतं. राहत्या घराच्या संपूर्ण मजल्यावर सुंदर फुलांची सजावट करण्यात आली होती. यानंतर अनुष्का-निखिलचं औक्षण करण्यात आलं. माप ओलांडून निखिलच्या साथीने अनुष्काने सासरी गृहप्रवेश केला. दोघांनी देवाचे व घरातील वरिष्ठांचे आशीर्वाद घेतले. नव्या सुनबाईंनी घरात येताच सर्वप्रथम किचनमध्ये सुद्धा पूजा केली. या सगळ्याची झलक या व्हिडीओमध्ये पाहायला मिळत आहे.

अनुष्का-निखिलच्या आयुष्याची आता एक नवीन सुरुवात झालेली आहे. या दोघांची पहिली भेट ‘कारभारी लयभारी’ या मालिकेच्या सेटवर झाली होती. सुरुवातीला दोघांमध्ये खूप छान मैत्री झाली अन् पुढे हळुहळू या मैत्रीचं रुपांतर प्रेमात झालं. अनुष्का-निखिल आता साता जन्माचे सोबती झाले आहेत.

दरम्यान, अनुष्का सध्या ‘वचन दिले तू मला’ या मालिकेत मुख्य भूमिका साकारतेय. तर, ‘लागिरं झालं जी’ मालिकेमुळे घराघरांत पोहोचलेला निखिल सध्या रंगभूमीवर ‘ऑल दि बेस्ट’ नाटकात काम करतोय. निखिलला पुन्हा एकदा टेलिव्हिजनवर पाहण्यासाठी चाहते उत्सुक आहेत.