Avinash Narkar Diwali Faral 2024 : सध्या सर्वत्र दिवाळीची लगभग सुरू आहे. संपूर्ण देशभरात हा सण मोठ्या आनंदाने व जल्लोषात साजरा केला जातो. फटाके, रोषणाई, घराघरांत बनवला जाणारा फराळ, फुलांची आरास या सगळ्या गोष्टींमुळे दिवाळीच्या दिवसांमध्ये आजूबाजूचं वातावरण प्रसन्न करून टाकणारं होतं. सामान्य लोकांप्रमाणे सेलिब्रिटी सुद्धा शूटिंगमधून ब्रेक घेत मोठ्या आनंदाने आपल्या कुटुंबीयांबरोबर दिवाळीचा सण साजरा करतात. अनेकांनी फराळ बनवायला सुरुवात देखील केली आहे.
ऐश्वर्या नारकर सध्या मालिकेच्या शूटिंगमध्ये व्यग्र आहेत. यामुळे त्यांच्या नवऱ्याने ( Avinash Narkar ) यंदा फराळ बनवण्यात पुढाकार घेतला आहे. अविनाश नारकरांनी करंज्या बनवतानाचा सुंदर व्हिडीओ सोशल मीडियावर शेअर केला आहे. यामध्ये अभिनेते स्वत:च्या हाताने सुबक अशा करंज्या बनवून त्यानंतर तळत असल्याचं पाहायला मिळालं.
हेही वाचा : मराठी अभिनेत्याने ३० व्या वाढदिवशी घेतली नवीन गाडी! नव्या कारचं नाव ठेवलंय खूपच खास, फोटो शेअर करत म्हणाला…
अविनाश नारकरांनी बनवल्या सुबक करंज्या
“चला चला या या या… सगळ्यांनी फराळाला या !!मी, ऐश्वर्या आणि आमच्या संपूर्ण परिवाराकडून तुम्हाला आणि तुमच्या संपूर्ण परिवाराला या मंगलमय, तेजोमय दिवाळी सणाच्या आणि नवीन वर्षाच्या खूप खूप खूप मनापासून शुभेच्छा.!!” असं कॅप्शन देत अविनाश नारकरांनी करंज्या बनवतानाचा व्हिडीओ शेअर केला आहे.
अविनाश नारकरांचं ( Avinash Narkar ) पाककौशल्य पाहून नेटकरी व त्यांचे चाहते भारावून गेले आहेत. ऐश्वर्या नारकरांनी पतीला फराळ बनवताना पाहून “कमाल करंज्या” अशी कमेंट केली आहे. तर, अन्य युजर्सनी “आम्ही कधी यायचं फराळ करायला?”, “अरे वाह दादा”, “मास्टर शेफ सर”, “तुम्ही नेहमीच काहीतरी वेगळं करत असता मस्तच” अशा प्रतिक्रिया या व्हिडीओवर दिल्या आहेत.
दरम्यान, अविनाश नारकर ( Avinash Narkar ) यांच्या कामाबद्दल सांगायचं झालं तर, आजवर त्यांनी अनेक लोकप्रिय मालिकांमध्ये भूमिका साकारल्या आहेत. मराठी नाटक, चित्रपट, मालिका अशा तिन्ही माध्यमांमध्ये त्यांनी आपल्या अभिनयाचा ठसा उमटवला आहे. नुकतेच ते ‘डंका हरिनामाचा’ या चित्रपटात झळकले होते. याशिवाय अविनाश नारकर सोशल मीडियावर विविध रील्स शेअर करून प्रेक्षकांचं मनोरंजन करत असतात.
