“त्या मुलीमध्ये स्वत:ला…”, आयुष संजीवचे रुचिता जामदारबद्दल वक्तव्य; म्हणाला, “ती नवीन…”

आतापर्यंत या शोमधून राधा पाटील, सोनाली राऊत, दिव्या शिंदे, सचिन कुमावत, ओंकार शिंदे, आयुष संजीव, रोशन भजनकर हे स्पर्धक घराबाहेर पडले आहेत. सध्या शोमध्ये राकेश बापट, सागर कारंडे, रुचिता जामदार, प्राजक्ता शुक्रे, दीपाली सय्यद, तन्वी कोलते, विशाल कोटियन, प्रभू शेळके, अनुश्री माने हे स्पर्धक आहेत.

या स्पर्धकांमध्ये विविध कारणांवरून सतत भांडणे होतात. जेव्हा काही स्पर्धक घराबाहेर पडतात, तेव्हा घरातील सदस्यांबद्दल वक्तव्य करताना दिसतात.

‘बिग बॉस मराठी’च्या घरातून काहीच दिवसांपूर्वी आयुष संजीव एलिमिनेट झाला. त्यानंतर त्याने विविध मुलाखतींमध्ये बिग बॉसचा खेळ, तसेच तिथे असलेल्या सदस्य यांबद्दल वक्तव्य केले.

‘लोकमत फिल्मी’ला दिलेल्या मुलाखतीत आयुषने रुचिता जामदारबद्दल वक्तव्य केले. तो नेमकं काय म्हणाला आहे, हे जाणून घेऊ. आयुष संजीव म्हणाला, “मी आणि करण एकमेकांना म्हणायचो की, महाराष्ट्र किती नशीबवान आहे; त्यांच्याकडे टीव्हीला रिमोट आहे. ते आवाज कमी करू शकतात, तो म्युट करू शकतात. पण, आम्ही काय करायचं? आम्ही कसं म्युट करणार, आम्हाला तर ऐकावंच लागतं. प्रेक्षकांना दीड तास ऐकावं लागतं. पण, आम्हाला २४ तास ऐकावं लागतं. त्यातली ८० टक्के गोष्ट उपयोगी नसते आणि २० टक्के मुद्द्याच्या गोष्टी असतात.”

पुढे तो म्हणाला, “त्या मुलीमध्ये स्वत:ला सुधारण्याची क्षमता आहे. ती पुन्हा पुन्हा त्याच चुका करत नाही; पण ती नवीन चुका करते. पण, तिला अजूनही आदर, शिस्त आणि बोलण्याची पद्धत शिकण्याची खूप गरज आहे. तिचा आवाज खूप कणखर आहे.”

“तिचे मुद्दे असतात. पण, जेव्हा ती मुद्दा मांडायला जाते, तेव्हा ती स्वत: एका मुद्दा बनते. ती काहीतरी असं करते की, स्वत:च चुकते. असंच सुरू राहिलं, तर ती लवकर बाहेर येईल. लोकांना त्रास झाला, तर ते तिला वोट करणार नाहीत. जर ती नॉमिनेट झाली, तर लोकांना असं वाटेल की, हिला सगळ्यात आधी काढा. असं व्हायला नको. कारण- तिच्यात क्षमता आहे. जे लोक त्यांचं खरं व्यक्तिमत्त्व दाखवतात, त्यातील एक रुचिता आहे”, असे म्हणत आयुषने रुचिताबद्दल वक्तव्य केले.

दरम्यान, आगामी काळात बिग बॉसच्या घरातील खेळ कसा बदलणार, हे पाहणे महत्त्वाचे ठरणार आहे.