प्राजक्तावर पीठ फेकलं, खुर्ची पाडली…! राखीकडून पुन्हा नियमभंग, घरातील ‘हे’ नऊ सदस्य Nominate, जाणून घ्या….

या सगळ्यात राखी सावंत ‘बिग बॉस’च्या घरात पुन्हा एकदा गोंधळ घालणार आहे. सध्या ‘बिग बॉस’ने घराची संपूर्ण जबाबदारी राखीच्या हातात सोपवली आहे. त्यामुळे संपूर्ण घराला ती स्वत:च्या तालावर नाचवतेय. राखी प्राजक्ताला झाडू मारून घर स्वच्छ करण्यास सांगते. पण, मी एकटी हे काम करणार नाही…असं म्हणत प्राजक्ता तिला स्पष्टपणे नकार देते.

प्राजक्ताने काम करण्यास नकार दिल्याने चिडलेली राखी किचनमधून पीठ आणते ते सोफ्यावर बसलेल्या प्राजक्ताच्या तोंडावर फेकते. या गोष्टीचा सचिन, सागर यांना प्रचंड राग येतो. सागर याबाबत राखीला जाब सुद्धा विचारतो. पण, राखी कोणाचंही ऐकून घेत नाही. “तुम्ही सगळे माझ्या पायाखाली आहात” असं राखी त्यांना ठणकावून सांगते.

भांडण टोकाला गेल्यावर सचिन कुमावत राखीच्या तोंडावर पाणी फेकून मारतो. यानंतर राखीचा संयम सुटतो…आपल्या तोंडावर पाणी कसं फेकलं? या विचारानेच तिचा संताप होतो आणि राखी रागात डायनिंग टेबलजवळची खुर्ची खाली पाडते.

राखीने पुन्हा एकदा ‘बिग बॉस’च्या प्रॉपर्टीचं नुकसान केलं आहे. गेल्या आठवड्यात भांडी फोडल्यामुळे राखीला कॅप्टन पदाच्या शर्यतीतून बाद केलं होतं. आता ‘बिग बॉस’ तिला काय शिक्षा सुनावणार याकडे सर्वांचं लक्ष असेल.