चांगले वागण्याचे नाटक करून डॅडींचा सूर्याला फसविण्याचा प्लॅन; प्रोमो पाहताच नेटकरी म्हणाले, “तुमचं पोरगं आणि तुम्ही…”

झी मराठी वाहिनीने ‘लाखात एक आमचा दादा’ मालिकेचा एक प्रोमो शेअर केला आहे. या प्रोमोमध्ये शत्रू आणि डॅडी यांच्यातील संभाषण पाहायला मिळत आहे. शत्रू डॅडींना म्हणतो, “म्हणजे हे सगळं नाटक होतं”, डॅडी म्हणतात, “तेजू तुमची होणार.आम्ही तिच्यासाठी स्थळ शोधून आणणार. लग्न ठरवणार आणि ते भरमांडवात मोडणार. लोक आम्हाला दोष देणार, आम्ही तुमचं नाव पुढे करणार आणि तुमचं लग्न तेजूशी लावून देणार. आनंदी आनंद गडे, सूर्याची तेजू शत्रूकडे आणि सूर्याची नाडी आमच्याकडे”, असे म्हणून डॅडी विचित्र पद्धतीने हसताना दिसत आहेत. त्याबरोबरच प्रोमोत दाखवल्याप्रमाणे मालिकेत नवीन एन्ट्री पाहायला मिळत आहे.

हा प्रोमो शेअर करताना झी मराठी वाहिनीने, सूर्या आणि तुळजाची डॅडी फसवणूक करणार, तेजू शत्रूची होणार..!, अशी कॅप्शन दिली आहे.

काय म्हणाले नेटकरी?

हा प्रोमो पाहिल्यानंतर नेटकऱ्यांनी कमेंट्स करीत प्रतिक्रिया दिल्या आहेत. एका नेटकऱ्याने म्हटले, “असू दे, सून किती गुणी आहे. तिच्यामुळे तुमचं पोरगं आणि तुम्ही तरी सुधाराल. आनंदी आनंदी गडे आमचं लक्ष तुमच्याकडे.” दुसऱ्या नेटकऱ्याने म्हटले, “हे जर चांगलं राहून केलं असतं तरीपण सूर्यानं तेजूला सून म्हणून तुमच्या घरात दिले असते.” आणखी एका नेटकऱ्याने म्हटले, “डॅडी हा तुमचा प्लॅन मला आधीपासून माहीत होता; पण मी कोणालाच नाही सांगितलं.”

मालिकेत दाखविल्याप्रमाणे, तुळजाला तिच्या बॉयफ्रेंड सिद्धार्थबरोबर लग्न करायचे असल्याने ती सूर्याच्या मदतीने तिच्या लग्नातून पळून जाते. मात्र, सिद्धार्थ तिची फसवणूक करतो आणि तो ठरलेल्या ठिकाणी येत नाही. ती परत तिच्या घरी येते. डॅडी रागात तुळजा आणि सूर्याचे लग्न लावून देतात. आता डॅडी त्यांचा अपमानाचा बदला घेत असल्याचे दिसत आहे. याबरोबरच शत्रूला सूर्याची बहीण तेजू आवडते, त्याला तिच्याबरोबरच लग्न करायचे आहे.

हेही वाचा: अथिया शेट्टी व केएल राहुल होणार आई-बाबा; लग्नानंतर दोन वर्षांनी करणार नव्या सदस्याचं स्वागत

दरम्यान, आता सूर्याला डॅडींचा प्लॅन कळणार का, मालिकेत पुढे काय होणार आणि नवीन एन्ट्री कोणाची आहे याबाबतदेखील प्रेक्षकांनी अंदाज बांधायला सुरुवात केली आहे. हा नवीन चेहरा कोण हे पाहण्यासाठी प्रेक्षक उत्सुक असल्याचे दिसत आहेत.