छोट्या पडद्यावरील मालिकांचा चाहतावर्ग मोठ्या प्रमाणात असतो. गेल्या काही महिन्यांत अनेक रील लाइफ जोड्या खऱ्या आयुष्यात एकत्र आल्याचं आपण पाहिलं. तितीक्षा तावडे-सिद्धार्थ बोडके, शिवानी सुर्वे-अजिंक्य ननावरे यांच्या पाठोपाठ ‘जीव माझा गुंतला’ फेम अभिनेत्री योगिता चव्हाण आणि सौरभ चौघुले यांनी लग्नगाठ बांधली आहे. इन्स्टाग्रामवर अचानक लग्नाचे फोटो शेअर करत या जोडप्याने चाहत्यांना सुखद दिला होता. पडद्यावरची जोडी खऱ्या आयुष्यात एकत्र आल्याने सध्या त्यांचे चाहते आनंद व्यक्त करत आहेत.
सौरभ – योगिता या दोघांच्या लग्नाला कलाविश्वातील बरेच कलाकार उपस्थित होते. फेब्रुवारी महिन्यात गुपचूप साखरपुडा उरकल्यावर या जोडप्याने मार्च महिन्यात लग्नगाठ बांधली. लग्नानंतर नुकत्याच एका मुलाखतीत अभिनेत्याने आपल्या लाडक्या बायकोसाठी मालवणीत उखाणा घेतला आहे.
हेही वाचा : राजकीय पक्षांचा प्रचार करणार का? स्वप्नील जोशीने मांडलं स्पष्ट मत; म्हणाला, “पैसे घेऊन विशिष्ट…”
सौरभ राजश्री मराठीला दिलेल्या मुलाखतीत मालवणी भाषेत उखाणा घेत म्हणाला, “शेजाऱ्यांच्या कलमाक धरलो आंबो जून, चव्हाणांच्या चेडवाक केलंय चौघुलेंची सून” तसेच नवऱ्याचा भन्नाट उखाणा ऐकल्यावर योगिता म्हणते, “जागोजागी होई मला याचेच भास, सौरभचं नाव घेऊन भरवते चीज केकचा घास” दोघांनी घेतलेल्या या हटके उखाण्यांची सध्या चर्चा रंगलेली आहे.
दरम्यान, योगिता आणि सौरभची पहिली भेट ‘जीव माझा गुंतला’ या मालिकेच्या सेटवर झाली होती. सुरुवातीला दोघांमध्ये घट्ट मैत्री झाली अन् पुढे या मैत्रीचं रुपांतर प्रेमात होऊन ऑनस्क्रीन अंतरा-मल्हारच्या जोडीने खऱ्या आयुष्यात एकत्र येण्याचा निर्णय घेतला. ३ मार्चला योगिता चव्हाण आणि सौरभ चौघुले यांचा विवाहसोहळा थाटामाटात पार पडला होता. त्यांच्या विवाहसोहळ्यातील बरेच फोटो आणि व्हिडीओ सोशल मीडियावर व्हायरल झाले असून चाहते त्यावर कौतुकाचा वर्षाव करत आहेत.
