“मराठी भाषेत बोलणार नाही” सांगणाऱ्या कॉलेजच्या मुलांची ‘कमळी’ करणार कानउघडणी! थेट विचारला ‘हा’ प्रश्न, प्रोमोचं सर्वत्र होतंय कौतुक

कमळी कॉलेजची GS आहे, त्यामुळे तिच्या कामकाजात कशा अडचणी निर्माण होतील, तिला सतत त्रास कसा काय होईल याकडे अनिकांचं संपूर्ण लक्ष असतं. आता कमळीच्या कॉलेजमध्ये २७ फेब्रुवारीला ‘मराठी भाषा गौरव दिन’ साजरा करण्यात येणार आहे. यावेळी कॉलेजचे काही विद्यार्थी मराठी भाषेतून बोलण्यास नकार देतात आणि अशा परिस्थिती आपल्या बहिणीच्या पाठिशी उभं राहायचं सोडून अनिका आजकाल इंग्रजी भाषा किती महत्त्वाची आहे याबद्दल कमळीला उलट उत्तर देत असते.

ज्या ठिकाणी ‘मराठी भाषा गौरव दिन’ साजरा करण्यात येत असतो तिथेच उभे राहून कॉलेजमधील काही मुलं मराठी बोलण्यास नकार देतात. “मुंबई-महाराष्ट्र कोणाच्या बापाचा नाहीये, आम्ही मराठी नाही आहोत, आम्ही मराठी भाषेत बोलणार नाही” असं या मुलांचं म्हणणं असतं.

इतक्यात मागून एन्ट्री होते कमळीची, ती म्हणते, “भावांनो जरा थांबा! तुम्ही महाराष्ट्रात राहताय ना? मग निदान इथल्या भाषेचा सन्मान तरी करा” यावर अनिका तिला सांगते, “आता सगळीकडे इंग्रजी भाषाच वापरतात”

पुढे कमळी सर्वांना उद्देशून म्हणते, “इंग्रजी भाषा जगाशी जोडते पण, माझी मराठी भाषा मला माझ्या मुळांशी जोडून ठेवते. संत परंपरेपासून ते आताच्या आधुनिक साहित्यापर्यंत…आपल्या मराठी भाषेने समाजाला विचार, मूल्य आणि प्रेरणा दिली आहे.”

“जिथे काम करून भाकरी-तुकडा कमवता…त्यांच्याशी जोडून राहण्याची गरज सुद्धा तुम्हाला वाटत नाही का?” असा थेट प्रश्न कमळी या मुलांना विचारते यानंतर त्यांचा चेहरा पडतो. सध्या मालिकेचा हा प्रोमो सोशल मीडियावर तुफान व्हायरल होत आहे.

दरम्यान, नेटकऱ्यांनी या प्रोमोचं सर्वत्र कौतुक केलं आहे. “टीमने खूप छान विषय घेतला”, “मालिका खूप छान सुरूये…विषय सुद्धा चांगले निवडत आहेत”, “मस्त कमळी”, “एकदम बरोबर” अशा प्रतिक्रिया या प्रोमोवर प्रेक्षकांनी दिल्या आहेत.