Video : “एक-दोन देशांचे गँगस्टर…”, कॅफेवरील गोळीबारानंतर कपिल शर्माचा लॉरेन्स बिश्नोई गँगला टोला?

काही महिन्यांपूर्वी कॅनडामधील कपिलच्या कॅफेवर हल्ला झाला होता. या हल्ल्याची जबाबदारी लॉरेन्स बिश्नोई गँगने घेतली होती. अशातच रोहित शेट्टीच्या घरावरील गोळीबाराची जबाबदारीसुद्धा लॉरेन्स बिश्नोई गँगने घेतल्याची पोस्ट व्हायरल झाली आहे. याचदरम्यान, कपिल शर्माने लॉरेन्स बिश्नोईविषयी नाव न घेता प्रतिक्रिया व्यक्त केली आहे.

कपिलने मंगळवारी (३ फेब्रुवारी) मुंबईतील नेटफ्लिक्सच्या ‘व्हॉट्स नेक्स्ट’च्या कार्यक्रमात बोलताना लॉरेन्स गँगविषयी वक्तव्य केलं. नेटफ्लिक्स इंडियाच्या सीईओ मोनिका शेरगिल यांनी कपिलशी संवाद साधताना “कपिल, खूप काळापासून आमची तुमच्यावर नजर आहे, संपूर्ण भारताचीही तुमच्यावर नजर आहे. फक्त ११ देशांच्या पोलिसांची नजर तुमच्यावर नसावी, अशी आशा आहे.” यावर कपिल लगेच उत्तर देत म्हणाला, “आजकाल एक-दोन देशांचे गँगस्टरही माझ्या मागे लागलेले आहेत.”

कपिलनं केलेलं हे वक्तव्य साहजिकच त्याच्या कॅफेवरील हल्ल्यासंदर्भात होतं. पण आपण केलेलं वक्तव्य संवेदनशील असल्याचं कळताच त्याने “हे वक्तव्य काढून टाका”, असं म्हटलं. पण त्यानंतर त्याला लक्षात आलं की, हा शो थेट लाईव्ह प्रसारीत केला जात आहे. त्यावर त्याने विषय बदलण्याचा प्रयत्न केला. कपिलने मीडियाला उद्देशून “सगळेच का मोबाइल घेऊन बसले आहात. मोबाइलशिवाय खऱ्या आयुष्याच्यादेखील आनंद घेतला पाहिजे. असो… तुमचं हे काम आहे. तुम्ही तुमचं काम करा. आम्ही आमचं काम करतो” असं म्हटलं.

दरम्यान, कपिलच्या कॅनडामधील कॅप्स कॅफेवर पहिला हल्ला जुलैमध्ये झाला होता; मग दुसरा हल्ला ऑगस्टमध्ये आणि तिसरा हल्ला ऑक्टोबरमध्ये झाला होता. सुदैवाने या घटनेत कुणालाही इजा झाली नव्हती. मात्र, आसपासच्या परिसरात भीतीचं वातावरण निर्माण झालं होतं.

View this post on Instagram

A post shared by TCX.official (@tellychakkar)

कॅनडामधील कॅफेवरील हल्ल्यानंतरच्या पहिल्या प्रतिक्रियेत त्याने “मला वाटतं तिकडे काही असे नियम आहेत, ज्यामुळे तिथल्या पोलिसांकडे पुरेशी अधिकारक्षमता नाही. आमच्या केसचा विषय पुढे गेला आणि तो थेट फेडरल सरकारपर्यंत पोहोचला. कॅनडाच्या संसदेतही यावर चर्चा झाली. तिथल्या स्थानिक लोकांनी आम्हाला खूप सहकार्य केलं” असं म्हटलं होतं.

तसंच यावेळी त्याने मुंबई पोलिसांबद्दल अभिमान असल्याचंही म्हटलं होतं. “मला माझ्या देशात, विशेषतः मुंबईत, कधीच असुरक्षित वाटलं नाही. आपल्या मुंबई पोलिसांसारखं कोणीच नाही”, अशी प्रतिक्रिया त्याने व्यक्त केली होती.