‘नवरी मिळे हिटलरला'(Navri Mile Hitlarla) ही मालिका लोकप्रिय मालिकांपैकी एक आहे. या मालिकेत सतत ट्विस्ट येताना दिसतात. लीला आणि एजेमधील होणारी छोटी-छोटी भांडणे प्रेक्षकांना आवडत असल्याचे पाहायला मिळते. याबरोबरच, ज्या पद्धतीने आजी लीलाला प्रोत्साहन देतात, तिची मदत करतात, सूनांना धडा शिकवण्यासाठी लीला नवीन पद्धतीचा अवलंब करत आहे; यामुळे प्रेक्षकांचे चांगलेच मनोरंजन होताना दिसत आहे. आता या मालिकेचा नवीन प्रोमो प्रेक्षकांच्या भेटीला आला आहे.
झी मराठी वाहिनीने ‘नवरी मिळे हिटलरला’ मालिकेचा नवीन प्रोमो प्रेक्षकांच्या भेटीला आणला आहे. या प्रोमोच्या सुरुवातीला, लीला एजेला पाडवा असून उटणं लावण्यासाठी आग्रह करते. मात्र, एजे तिला नाही म्हणत असतो. तरीही लीला हट्ट धरते. एजे तिला म्हणतो, “तुला सांगितलं ना, मी असलं काही करणार नाही”, त्यावर लीला म्हणते, “चूपचाप पाटावर बसा, नाहीतर जो माझं ऐकतो, त्याला मी बोलवेन.” तेवढ्यात त्यांचा टायगर नावाचा कुत्रा पळत येतो आणि एजेच्या कपड्यांना धरून त्याला ओढत पाटावर घेऊन जातो. त्यानंतर लीला एजेला उटणे लावते.
हा प्रोमो शेअर करताना झी मराठी वाहिनीने, “लीलाच्या हट्टापुढे एजे झुकणार, पाडव्याचा सण साजरा होणार…!”, अशी कॅप्शन दिली आहे.
नेटकऱ्यांनी या प्रोमोवर कमेंट करत प्रतिक्रिया दिल्या आहेत. “हे दोघे एकमेकांसाठी बनले आहेत”, “यांच्यामुळे मला खूप आनंद मिळतो”, “खूप छान प्रोमो”, “लीला मस्त, असंच करायचं”, अशा कमेंट करत या मालिकेबद्दल प्रेम व्यक्त केले आहे.
मालिकेत दाखविल्याप्रमाणे, लीला एजेच्या प्रेमात पडली असून तिने तिच्या भावना त्याच्याजवळ व्यक्त केल्या आहेत. मात्र, एजे अजूनही त्याच्या पहिल्या बायकोवर अंतरावर प्रेम करतो. काही दिवसांपू्र्वी गैरसमजामुळे एजेने लीलाला बाहेर काढले होते. मात्र, आजीने समजावल्यानंतर लीला पुन्हा घरी येण्याचे मान्य करते; जेव्हा ती घरी परत येते त्यावेळी ती तिच्या सुनांना कामाला लावते. दुर्गा, लक्ष्मी, सरस्वती या तिच्या तिन्ही सुना लीलाचे नवे रूप पाहून आश्चर्यचकित होतात.
आता ती एजेच्या मनात घर करणार का, एजे लीलाच्या प्रेमात पडणार का, हे पाहणे महत्त्वाचे ठरणार आहे. मालिकेत पुढे काय होणार हे पाहण्यासाठी प्रेक्षक उत्सुक असल्याचे पाहायला मिळत आहे.
