माधुरी दीक्षित आली हो! हिरव्या पैठणीत खुललं सौंदर्य, ‘कोण होणार करोडपती’ची नवीन होस्ट; १० ऑगस्ट तारीख खास आहे कारण…

माधुरी दीक्षित ‘कोण होणार करोडपती’ची नवीन होस्ट असेल हे आज ( १० ऑगस्ट ) जाहीर करण्यात आलं आहे. पण, तुम्हाला माहितीये का? आजचा दिवस माधुरीसाठी खूपच खास आहे. ‘धकधक गर्ल’ने १९८४ मध्ये प्रदर्शित झालेल्या ‘अबोध’ सिनेमातून बॉलीवूडमध्ये पदार्पण केलं होतं. हा सिनेमा १० ऑगस्ट १९८४ रोजी प्रदर्शित झाला होता. माधुरीच्या इंडस्ट्रीतल्या पदार्पणाला आज बरोबर ४२ वर्षे पूर्ण झाली आहेत आणि बरोबर आजच्याच दिवशी ‘कोण होणार करोडपती’चा माधुरीच्या एन्ट्रीचा प्रोमो रिलीज करण्यात आला आहे. त्यामुळे हा दिवस अभिनेत्रीसाठी खास ठरला आहे.

‘कोण होणार करोडपती’च्या प्रोमोमध्ये माधुरी दीक्षित हिरवी पैठणी साडी, नाकात नथ, कपाळावर चंद्रकोर अशा मराठमोळ्या अंदाजात एन्ट्री घेते. तिचा रॉयल लूक पाहून सगळेच भारावून गेले आहेत. माधुरी म्हणते, “जे कधीही घडलं नाही, ते घडणार…महाराष्ट्राच्या घरोघरी चर्चा रंगणार…कारण, आता खेळ बदलणार…! सुरू होत आहे…‘कोण होणार करोडपती’! लवकरच सोनी मराठी वाहिनीवर.”

नेटकऱ्यांनी या प्रोमोवर कौतुकाचा वर्षाव केला आहे. तसेच ‘धकधक गर्ल’च्या चाहत्यांनी तिला या नव्या प्रवासासाठी शुभेच्छा सुद्धा दिल्या आहेत. यापूर्वी स्वप्नील जोशी, नागराज मंजुळे, सचिन खेडेकर या कलाकारांनी या करोडपती शोची ( मराठी सीझन ) होस्ट म्हणून जबाबदारी सांभाळली होती. पण, यंदा माधुरी प्रेक्षकांना होस्टच्या भूमिकेत झळकताना दिसेल.

आता ‘कोण होणार करोडपती’चा हा नवीन सीझन प्रेक्षकांच्या भेटीला केव्हा येणार याची चाहते आतुरतेने वाट पाहत आहेत. लवकरच याची माहिती सोनी मराठीकडून शेअर केली जाईल.

दरम्यान, माधुरीच्या वर्कफ्रंटबद्दल सांगायचं झालं तर, नुकतीच ती ‘माँ बहन’ सीरिजमध्ये झळकली. यामध्ये तिच्यासह तृप्ती डिमरी, धरना दुर्गा, रवि किशन यांच्या महत्त्वपूर्ण भूमिका होत्या.