“ईशाला लोक बोलतात तो युपीचा आहे…”, आम्ही १० वर्षे लिव्ह-इनमध्ये राहतोय! ऋषी सक्सेनाचे वडील म्हणाले, “बेटा तुमचं…”

ईशा आणि ऋषी यांनी प्रेमाची जाहीर कबुली दिल्यावर सुरुवातीला त्यांना ट्रोलिंगचा सामनाही करावा लागला होता. ऋषी याबद्दल सोनाली खरेला दिलेल्या पॉडकास्टमध्ये म्हणाला, “मला फार त्रास होत नाही पण, ईशाला खूप लोक म्हणतात…तो युपीचा आहे वगैरे” पण, ऋषी सक्सेना मूळचा राजस्थानचा आहे. जोधपूरमधील शाळेत त्याने शालेय शिक्षण पूर्ण केलं आहे.

ऋषी सक्सेना म्हणाला, “आम्ही लिव्ह इन मध्ये राहतोय याचा मला खरंतर कधीच काहीच त्रास झाला नाही. आता सगळ्यांना माहितीये की, आम्ही दोघं लिव्ह-इनमध्ये राहतोय. पण, ईशाला याचा जरा त्रास होतो. तिला खूप लोक म्हणतात, त्याच्याबरोबर राहतेय…दोघांनी लग्न सुद्धा केलेलं नाहीये. तो युपीचा आहे..वगैरे असं सगळे लोक म्हणत असतात. ईशाला या सगळ्याचा जास्त त्रास होतो. पण, मला फार काही वाटत नाही.”

ऋषी पुढे सांगतो, “जेव्हा मी माझ्या बाबांना लिव्ह-इनबद्दल सांगितलं होतं…तेव्हा ते म्हणाले होते, ‘आता बेटा तुमचं आयुष्य आहे..बघा आता तुम्हाला योग्य वाटतंय ते करा.’ अर्थात, ते यापासून आनंदी वगैरे नव्हतेच. पण, त्यांनी तुम्हाला योग्य वाटतंय ते करा असा एक निर्णय सांगितला होता. एकंदर दोघांच्याही कुटुंबांकडून आम्हाला कधीच नकार वगैरे मिळाला नाही किंवा काहीच त्रास झाला नाही. प्रॉब्लेम एकच असतो…जर तुमचं लग्न झालेलं नसेल तर तुम्हाला कोणीही भाड्याने राहायला घर देत नाही. मुंबईत अशा बऱ्याच सोसायटी आहेत…ज्यामध्ये लग्न झालेलं असेल तरच राहायला घर मिळेल असा नियम आहे. म्हणजे, जरी तुम्ही १० वर्षे एकत्र असाल आणि तुमचं लग्न झालेलं नसेल तरीही तुम्हाला घर मिळणार नाहीये. आता आम्हाला सुद्धा एकत्र राहून १० वर्षे होतील.”

“लग्न करणं ही गरज नाहीये…पण, लग्न करायचंय. जेव्हा योग्य वेळ येईल तेव्हा आम्ही लग्न करू. आम्हाला एकत्र राहायचंय हे तर नक्की झालेलं आहे…नाहीतर आम्ही १० वर्षे एकत्र राहिलोच नसतो, ते शक्य नव्हतं. तर, आम्ही एकत्र आहोत हे नक्की…पण, पुढे योग्य वेळ येईल तेव्हा आम्ही निर्णय घेऊ.” असं ऋषीने सांगितलं.