“नाटकाला किंवा शूटिंगला जाईन पण…”, स्वत:च्याच लेकींच्या लग्नात जाणार नाहीत भाऊ कदम? स्वत: केलेला खुलासा

मुलींच्या लग्नाचा विचार हा एखाद्या सामान्य वडिलांना अस्वस्थ करत असतो, तसंच मुलींच्या लग्नाबद्दल भाऊ कदमसुद्धा अस्वस्थ होतात. भाऊ कदम यांना तीन मुली असून संचिता, समृद्धी व मृण्मयी अशी त्यांची नावे आहेत. एकदा त्यांच्या लग्नाबद्दल बोलताना भाऊ कदम हे भावुक झाले होते. त्यामुळे ते त्यांच्या लग्नात हजर राहणार नसल्याचे म्हणाले होते.

एका जुन्या मुलाखतीत भाऊ कदम यांनी मी ‘मुलींच्या लग्नाच्या दिवशी नाटकाला जाईन किंवा शूटिंगला तरी जाईन’, असं म्हटलं होतं. ते म्हणालेले, “एखाद्या माणसाला जेव्हा एक मुलगी असते आणि तिचं लग्न होऊन ती सासरी जाते, तेव्हा त्या मुलीच्या बापाला काय वाटतं हे एका मुलीसाठी ठीक आहे. पण माझ्या तर तीन-तीन मुली आहेत. प्रत्येकवेळी मी किती रडायचं… त्या कुठे गेल्या नाही पाहिजेत. मला तर वाटणारच नाही की, त्यांनी कधी जावं. त्यांनी कायम माझ्या जवळच राहावं असंच मला वाटतं.”

यापुढे “मुलींच्या लग्नात काय होईल माहीत नाही. त्यांच्या लग्नात मी एक तर नाटकाला तरी जाईन किंवा शूटिंगला तरी जाईन. नाहीतर कुठे तरी व्यग्र आहे असं सांगेन. मग हवं तर नंतर त्यांच्या घरी (सासरी) जाईन. मी मुलींच्या लग्नाचा विचारच करू शकत नाही. मी ‘दाटून कंठ येतो’ हे गाणं गाऊच शकत नाही. एकदा मी ते गाणं गात होतो, पण गाता-गाता मध्येच थांबलो. गाण्याचे शब्द ऐकून माझ्या मनात मुलींचा विचार आला”, असे म्हटले होते.

दरम्यान, भाऊ कदम हे लोकप्रिय मराठी विनोदी कलाकार आहे. त्यांनी अनेक विनोदी कार्यक्रमांमधून प्रेक्षकांना भरभरून हसवले आहे. इतकंच नव्हे तर ते विविध नाटक, चित्रपट तसच वेबसीरिजमधूनही प्रेक्षकांच्या भेटीला आले आहेत. ‘हाफ तिकीट’, ‘नशीबवान’, ‘सायकल’, ‘घे डबल’, ‘व्हीआयपी गाढव’, ‘पांडू’सह अनेक चित्रपटांतील त्यांच्या भूमिका गाजल्या आहेत.

भाऊ कदम लवकरच निलेश साबळेबरोबर एका नव्या सिनेमातून प्रेक्षकांच्या भेटीला येणार आहेत. ‘चंद्रकांता’ असं या चित्रपटाचं नाव आहे. यानिमित्ताने निलेश साबळे पहिल्यांदाच दिग्दर्शन करत आहे. तसंच या चित्रपटाचे लिखाणही त्याने केलं आहे आणि अभिनयसुद्धा केला आहे.