१ डिसेंबरपासून सुरू होणार ‘ही’ नवीन मालिका! मुख्य नायिका म्हणाली, “माझ्या सासूबाईंनी ठणकावून सांगितलंय…”

‘मी संसार माझा रेखिते’ या नव्या मालिकेचा प्रोमो नुकताच प्रेक्षकांच्या भेटीला आला. ही मालिका येत्या १ डिसेंबरपासून ‘सन मराठी’ वाहिनीवर प्रसारित केली जाणार आहे.

संपूर्ण कुटुंबाची काळजी घेणारी, कोणतीच अपेक्षा न ठेवता नात्यांना जपणारी अनुप्रिया १ डिसेंबर पासून रोज रात्री ९:३० वाजता प्रेक्षकांच्या भेटीला येणार आहे. यामध्ये लोकप्रिय अभिनेत्री दीप्ती केतकर प्रमुख भूमिका साकारणार आहे. ‘मी संसार माझा रेखिते’ या मालिकेत प्रेक्षकांना अनेक लोकप्रिया कलाकार एकत्र झळकताना दिसतील.

मालिकेच्या प्रोमोमध्येच उत्कृष्ट कलाकारांची मांदियाळी पाहायला मिळत आहे. मुख्य अभिनेत्री दीप्ती केतकरसह, हरीश दुधाडे, आभा बोडस, संजीवनी जाधव, प्रणिता आचरेकर, संदीप गायकवाड आणि दीप्ती सोनावणे हे सगळे कलाकार या मालिकेची रंगत वाढवण्यासाठी सज्ज आहेत.

मालिकेचा विषय प्रत्येक गृहिणीला आपलंसं करून घेणारा आहे. याचसह मालिकेत मायलेकीचं घट्ट नातं पाहायला मिळतंय. ‘जोडायचं ठरवलं तर सगळं जोडता येतं’ या सुंदर तत्त्वावर मालिका आधारित आहे. प्रोमोला मिळालेल्या प्रतिसादावरून मालिकेला भरपूर प्रेम मिळेल अशी खात्री वाटते.

याविषयी दीप्ती केतकर सांगते, “‘मी संसार माझा रेखिते’ या मालिकेसाठी खूप उत्सुक आहे. मी अशाच भूमिकेची वाट पाहत होते. या मालिकेतील अनुप्रिया अगदी तशीच आहे. स्वतःच्या कुटुंबावर असलेलं प्रेम, त्यांची काळजी या सगळ्यात अनुप्रिया तिची स्वप्न बाजूला ठेवून कुटुंबासाठी प्रत्येक गोष्ट आवडीने करते. या गोष्टीचा तिला कुठेच त्रास होत नाही. अनुप्रिया आणि माझ्यात एकच फरक आहे की, मला माझ्या कुटुंबाचा पूर्ण पाठिंबा आहे. अनुप्रियाच्या बाबतीत तसं नाहीये. या मालिकेसाठी माझ्या सासूबाई, नवरा व मुलगी माझ्यापेक्षा जास्त खूश आहेत. सासूबाईंनी मला ठणकावून सांगितलं आहे की, आता पूर्णपणे कामाकडे लक्ष दे आमची काळजी करू नकोस.”

पुढे दीप्ती केतकर सांगते, “माझ्यासाठी मुलीकडून “आई तू खूप छान काम करते” हे वाक्य ऐकणं कोणत्याही अवॉर्डपेक्षा मोठं आहे. मालिकेत अनुप्रियाची मुलगीही तिच्या मागे खंबीर उभी असते. या बरोबरच आमची टीम खूप जबरदस्त आहे. त्यामुळे काम करायला मजा येईल. हळुहळू अनुप्रियाच्या प्रत्येक छटा मला जाणून घ्यायच्या आहेत. ही मालिका प्रत्येक गृहिणीला आपलीशी वाटेल ही खात्री आहे. प्रत्येक मालिकेनंतर मी कुटुंबासाठी ब्रेक घेत असते पण आता मी थांबणार नाही. प्रेक्षकांना इतकंच सांगेन की, अनुप्रियाला भरभरून प्रेम व आशीर्वाद द्या.”