मेघना एरंडेने केलं असं काही की…; क्रांती रेडकरच्या जुळ्या मुली झाल्या थक्क! ‘तो’ गोड Video व्हायरल

मेघना एरंडे उत्तम अभिनेत्री आहेच पण, ती उत्तम डबिंग आर्टिस्ट म्हणून देखील ओळखली जाते. डोरेमॉन, शिनचॅन, निंजा हातोडी अशा अनेक लोकप्रिय कार्टुन्सला तिने स्वत:चा आवाज दिला आहे.

क्रांती रेडकरला दोन जुळ्या मुली आहेत. त्यांना अभिनेत्री प्रेमाने छबिल व गोदो म्हणते. या दोघी पहिल्यांदाच मेघनाला भेटल्या आणि थक्क झाल्या; यामागे एक खास कारण आहे. ते नेमकं काय आहे पाहुयात…

मेघना एरंडे जेव्हा क्रांतीच्या मुलींना भेटली तेव्हा तिने मिकीमाऊसच्या आवाजात त्यांच्याशी संवाद साधला. आता लहान मुलांना कार्टुन आवडतं हे सर्वांनाच माहिती आहे. त्यातही मिकीमाऊसचा हुबेहूब आवाज ऐकून छबिल-गोदो थक्क झाल्या होत्या…मिकीमाऊसचा आवाज प्रत्यक्ष ऐकल्यावर त्यांचा आनंद गगनात मावेनासा झाला होता. क्रांतीने हा गोड क्षण शूट करून याचा व्हिडीओ सोशल मीडियावर शेअर केला आहे.

क्रांती रेडकर लिहिते, “थँक्यू पमा ताई ( मेघना एरंडे ) हे माझ्या मुलींसाठी खूपच गोड गिफ्ट होतं. खरंतर, तुझा आवाज ऐकून त्या दोघीही शॉक झाल्या होत्या…त्यांना खूप छान वाटलं. तुमच्या ‘सनई चौघडे’ मालिकेच्या टीमला खूप-खूप शुभेच्छा!” नेटकऱ्यांनी या पोस्टवर कौतुकाचा वर्षाव केला आहे.

दरम्यान, मेघना एरंडेच्या ‘सनई चौघडे’ मालिकेबद्दल सांगायचं झालं तर, ही मालिका ‘झी मराठी’वर दररोज रात्री ८:३० वाजता प्रसारित केली जाते. यामध्ये मेघनासह चिन्मयी साळवी, सुहास शिरसाट, राज हंचनाळे, अदिती सारंगधर, पालवी कदम या कलाकारांच्या महत्त्वपूर्ण भूमिका आहेत. आता प्रेक्षक या मालिकेला कसा प्रतिसाद देतात हे पाहणं महत्त्वाचं ठरणार आहे.