लैंगिक छळाचे खोटे आरोप भोवणार? शिल्पा शिंदेविरोधात पुरुष हक्क संघटनेने मुंबई पोलिसांकडे केली ‘ही’ मागणी

मानधन मिळावे म्हणून निर्मात्यांवर खोटे आरोप

अभिनेत्री शिल्पा शिंदेने नुकतीच भारती सिंह आणि हर्ष लिंबाचिया यांच्या चॅनेलला मुलाखत दिली. यावेळी तिने निर्मात्यांसह झालेल्या वादाचे आणि पोलिस केस यांचा उल्लेख केला. त्यावेळी घडलेले प्रकार सांगताना निर्मात्यांनी दिलेला त्रास आणि मालिका सोडण्याचे कारण सांगितले. शिल्पा शिंदेला कोणत्याही इतर मालिकेमध्ये किंवा चॅनेलवर काम मिळू नये यासाठी निर्मात्यांनी प्रयत्न केले, तसेच तिला धमकावण्याचा प्रयत्न केल्याचे शिल्पाने नमूद केले. मात्र, हे सांगत असताना तीन महिन्यांचे मानधन न दिल्यामुळे निर्मात्यांवर खोटे लैंगिक छळाचे आरोप केल्याचा खुलासा शिल्पा शिंदे हिने स्वतःच केला. अभिनेत्री शिल्पा म्हणाली, “आज पहिल्यांदा हे खरे सांगते की, मी मानधन मिळावे म्हणून निर्मात्यांवर खोटे आरोप केले होते, ते सर्व खोटे होते. नंतर आमच्यामध्ये सामंजस्याने बोलणी झाली आणि मला माझे पैसे मिळाले.”

शिल्पाविरुद्ध कारवाई सुरू करण्याची मागणी

लैंगिक छळाचे खोटे आरोप केल्याचा खुलासा शिल्पा शिंदेने केल्यानंतर वाद निर्माण झाला आहे. दिल्लीतील पुरुषांच्या हक्कांसाठी कार्यरत असलेल्या ‘NCMIndia Council for Men Affairs’ या संस्थेने या प्रकरणाची दखल घेतली आहे. खोटे लैंगिक छळाचे आरोप केल्यामुळे त्यांनी मुंबई पोलिसांकडे धाव घेतली आहे. अभिनेत्री शिल्पाविरुद्ध कारवाई सुरू करण्याची मागणी त्यांनी केली आहे.

या संस्थेने सोशल मीडियाच्या माध्यमातून शिल्पाने केलेल्या कबुलीवर जाहीर टीका केली आणि अधिकाऱ्यांना या प्रकरणाचा तपास करून योग्य ती कायदेशीर कारवाई करण्याची मागणी केली आहे, त्यामुळे अभिनेत्री शिल्पा शिंदेच्या अडचणींमध्ये वाढ होण्याची शक्यता आहे.

Dear @MumbaiPolice please arrest Shilpa Shinde for lodging a false sexual harassment case against her producer. pic.twitter.com/JZCJY6XZLA

— NCMIndia Council For Men Affairs (@NCMIndiaa) June 2, 2026

सध्या निर्मात्यांसह कोणतेही वाद नाही – शिल्पा

मुंबई पोलिसांनी अभिनेत्री शिल्पा शिंदेवर खोट्या केसमुळे कारवाई करावी अशी मागणी एनजीओकडून करण्यात आली आहे. यावर मुंबई पोलिसांनी प्रतिक्रिया न दिल्यामुळे एनजीओने एक्सवर पोस्ट करत लिहिले आहे की, मुंबई पोलिस कोणतीही प्रतिक्रिया देत नाहीयेत. बुधवारी तुमची सुट्टी असते की आम्हाला काही फी द्यावी लागेल ज्यामुळे तुम्ही रिप्लाय द्याल, अशी पोस्ट एनजीओकडून पुन्हा एकदा करण्यात आली आहे; त्यामुळे अभिनेत्री शिल्पा शिंदेच्या खोट्या लैंगिक छळाच्या केसवरून तिच्यावर कारवाई होण्याची शक्यता आहे. या मुलाखतीमध्ये सध्या निर्मात्यांसह कोणतेही वाद नसून, आता त्यांच्यामध्ये चांगले संबंध असल्याचे शिल्पा शिंदे म्हणाली होती, यामुळे तिच्यावर कारवाई होणार की नाही याबाबत चर्चा सुरू आहे.