“असं दर्शन आजपर्यंत कधीच झालं नाही”, मिलिंद गवळींनी सांगितला सिद्धिविनायक मंदिरातील अनुभव, म्हणाले, “दैवी ऊर्जा…”

मिलिंद गवळी सोशल मीडियाद्वारे अनेक फोटो व व्हिडीओ शेअर करत चाहत्यांच्या संपर्कात राहत असतात. सोशल मीडियाद्वारे ते त्यांच्या वैयक्तिक आयुष्यातील अनेक घटना व प्रसंगे शेअर करत असतात. अशातच त्यांनी मुंबईतील सिद्धीविनायक मंदिरातील खास अनुभव शेअर केला आहे. सोशल मीडियाद्वारे खास व्हिडीओ शेअर करत त्यांनी हा अनुभव सांगितला आहे.

या व्हिडीओखालील कॅप्शनमध्ये मिलिंद गवळींनी असं म्हटलं आहे की, “प्रत्येक गोष्टीचा योग घ्यावा लागतो. योग्य वेळी सगळ्या गोष्टी घडत असतात. परमेश्वराच्या आशीर्वादाशिवाय झाडाचं एकही पान हलत नाही. गेल्या अनेक वर्षात माझं सिद्धिविनायक गणपती बाप्पाचं दर्शन झालं नाही आणि गेल्या चार दिवसांमध्ये दोन वेळा अतिशय सुंदर दर्शन झालं. काही दिवसापूर्वी ‘झापुक झुपूक’ चित्रपटाच्या ट्रेलर लॉंचच्या दिवशी आम्ही सगळे कलाकार सिद्धिविनायक गणपती बाप्पाचे दर्शन घ्यायला गेलो.”

यापुढे त्यांनी असं लिहिलं आहे की, “तिथे दर्शन घेत असताना मनात विचार आला की, माझ्या पत्नीला म्हणजे दिपाला सिद्धिविनायकाची खूप ओढ आहे. तर आमच्या इतकं सुंदर दर्शन खरंतर तिचं पण व्हायला हवं होतं. मी तिला घेऊन यायला हवं होतं. मी मनात म्हटलं एक दिवस तिला बाप्पाच्या दर्शनाला नक्की घेऊन येइन आणि अगदी दोन दिवसांनी प्रतीक गायकवाड नावाच्या गृहस्थाचा मला फोन आला. तो म्हणाला की, “सिद्धिविनायकाच्या आरतीला तुम्ही याल का?” मला हा चमत्कार वाटला. मी त्याला म्हटलं “हो! मला यायला नक्की आवडेल आणि मी सह-पत्नी आरतीसाठी येईन.”

पुढे मिलिंद गवळींनी असं म्हटलं आहे की, “संकष्टीच्या दिवशी सिद्धिविनायक मंदिराच्या गाभाऱ्यात मी आणि दिपा जवळजवळ दोन तास होतो. गणपती बाप्पाची सुंदर पूजाअर्चा आणि छान आरती झाली. सगळं अनुभवायला मिळालं. बाप्पाकडून एक वेगळीच ऊर्जा घेऊन घरी आलो. अगदी लहानपणापासून या मंदिरात आम्ही येतोय. दादरला राहत असताना माझी आई आणि दिपा दर मंगळवारी सिद्धिविनायकाच्या दर्शनाला जायच्या.”

यापुढे मिलिंद गवळींनी जुनी आठवण सांगत म्हटलं की, “दिपा दर महिन्याला मंदिरामध्ये पहिल्या मजल्यावर २१ रुपयांची पूजा करायची. तशी पूजा आज मंदिरात होते की नाही माहित नाही. पण असं सुंदर दर्शन आजपर्यंत कधीच झालं नाही. आपल्या सिद्धिविनायक मंदिरामध्ये एक वेगळीच ऊर्जा आहे. जी मला प्रकर्षाने जाणवली. आपल्याकडे खूप कमी मंदिरांमध्ये अशी दैवी ऊर्जा जाणवते.” दरम्यान, मिलिंद गवळींची ही पोस्ट सध्या सोशल मीडियावर व्हायरल होत आहे.