अहिल्यादेवी व लक्ष्मीने खेळली फुगडी; ढोल-ताशाच्या तालावर धरला ठेका, पाहा व्हिडीओ

अहिल्यादेवी व लक्ष्मीने खेळली फुगडी

झी मराठी वाहिनीने सोशल मीडियावर एक व्हिडीओ शेअर केला आहे. या व्हिडीओमध्ये ढोल-ताशाचा आवाज ऐकायला मिळत आहे. या तालाच्या गजरात अहिल्यादेवी व लक्ष्मी यांनी फुगडी खेळल्याचे पाहायला मिळत आहे. त्यानंतर त्यांनी त्यावर ठेकाही धरला आहे. झी मराठीने शेअर केलेल्या या व्हिडीओमध्ये अभिनेत्री मुग्धा कर्णिक यांना टॅग केले आहे. पारू मालिकेत मुग्धा कर्णिक यांनी अहिल्यादेवी किर्लोस्कर ही भूमिका साकारली आहे. लक्ष्मी निवास मध्ये लक्ष्मी ही भूमिका अभिनेत्री हर्षदा खानविलकर यांनी साकारली आहे. पारू मालिकेची लोकप्रियता मोठी असल्याचे वेळोवेळी पाहायला मिळते. तर काही दिवसांपूर्वीच प्रेक्षकांच्या भेटीला आलेल्या लक्ष्मी निवास या मालिकेनेही प्रेक्षकांच्या मनात जागा निर्माण केली आहे.

नुकत्याच समोर आलेल्या प्रोमोत जयंत व अहिल्यादेवी समोरासमोर आल्याचे पाहायला मिळाले होते. पॅलेसवरून त्यांच्यात वाद निर्माण झाल्याचे पाहायला मिळाले होते. लक्ष्मी निवास’ या मालिकेत काही दिवसांपूर्वीच जान्हवी व जयंतचे लग्न ठरले आहे. त्यांच्या लग्नामुळे जान्हवीच्या घरातील सर्व जण आनंदात असल्याचे दिसत आहे. श्रीकांत व लक्ष्मी यांना जयंत हा जान्हवीसाठी योग्य वाटत असल्यामुळे तेदेखील आनंदात आहेत. दुसरीकडे पारू या मालिकेत अहिल्यादेवीने अनुष्का व आदित्यचे लग्न ठरवले आहे. अहिल्यादेवीसाठी आदित्यने अनुष्काबरोबर साखरपुडा करण्यास होकार दिला आहे.

दरम्यान, आता हे दोन कलाकार एकत्र आल्यानंतर महाएपिसोडमध्ये काय धमाल पाहायला मिळणार, हे पाहणे महत्वाचे ठरणार आहे.