‘महाराष्ट्राची हास्यजत्रा’ या कार्यक्रमाने संपूर्ण महाराष्ट्राला वेड लावलं, आज प्रेक्षक आवडीने हा कार्यक्रम पाहतात. या कार्यक्रमातून बरेच नवे चेहरे लोकांना माहीत झाले, इतकंच नव्हे, ते घराघरांत पोहोचले. त्यापैकीच एक चेहरा म्हणजे पृथ्वीक प्रताप. पृथ्वीक प्रतापने आतापर्यंत अनेक चित्रपट व मालिकांमध्ये काम केलंय, पण ‘महाराष्ट्राची हास्यजत्रा’ या कार्यक्रमामुळे त्याला एक वेगळीच ओळख मिळाली.
नुकतंच पृथ्वीकने ‘संपूर्ण स्वराज’ या यूट्यूब चॅनलच्या पॉडकास्टमध्ये हजेरी लावली अन् त्याच्या या प्रवासाबद्दल बरेच खुलासे केले. या मुलाखतीमध्ये पृथ्वीकने त्याच्यावर शाहरुख खानचा किती प्रभाव आहे यावर भाष्य केलं. लहानपणापासूनच पृथ्वीकला शाहरुख खान बनायचं होतं, नंतर जेव्हा तो या क्षेत्रात आला तेव्हा त्याला हे जाणवलं की शाहरुख खान बनण्याआधी एक अभिनेता बनणं फार महत्त्वाचं आहे.
या एकंदर प्रवासाबद्दल आणि शाहरुख खानबद्दल पृथ्वीक म्हणाला, “मला शाहरुखचा चार्म आणि करिश्मा प्रचंड आवडतो. तो फक्त स्क्रीनवर त्याचे दोन हात बाहेर काढून नुसता उभा राहतो आणि आपण त्याच्या प्रेमात पडतो. हे मला लहानपणी आवडायचं, पण जसजसा मी मोठा होत गेलो तेव्हा त्याच्या स्ट्रगलबद्दल जाणून घेतलं आणि तेव्हा जाणीव झाली की या माणसाने नेमकी काय मेहनत घेतली आहे.”
पुढे पृथ्वीक म्हणाला, “आपल्या आई-वडिलांना गमावून एका अनोळखी राज्यात आणि शहरात येणं, हळूहळू त्या शहरावर आणि मग जगावर राज्य करणं. ही अशक्य गोष्ट शाहरुखने शक्य करून दाखवली, याचसाठी मला तो आवडतो.” याच मुलाखतीमध्ये पृथ्वीकने अशा बऱ्याच गोष्टींवर भाष्य केलं आहे.
